الماتىلىقتار ەكپە سالدىرۋدان رەكورد جاسادى

قالامىزدىڭ تۇرعىندارى ءبىر تاۋلىكتە 11 مىڭنان استام ۆاكسينا العان.

الماتىدا ۆاكسينا الاتىن ادامداردىڭ تاۋلىكتىك كورسەتكىشى ايتارلىقتاي ءوستى، دەپ حابارلايدى Almaty-akshamy.kz Almaty.tv ارناسىنا سىلتەمە جاساپ.

24 ساعات ىشىندە 11 مىڭنان استام ازامات ەكپە سالدىرعان.  ۆاكسينا العانداردىڭ جالپى سانى 433 000-نان استى، مەگاپوليس ۆاكسيناسيا دەڭگەيى بويىنشا ءالى دە كوش باستاپ تۇر. مەديسينا قىزمەتكەرلەرىنىڭ ايتۋىنشا، ەكپە سالدىرۋشىلاردىڭ كوبىسى جاستار.

«بۇگىن تاڭەرتەڭ 100-گە جۋىق ادامعا ۆاكسينا ەگىلدى. ءبىز ۆاكسيناسياعا ادامداردىڭ وتە بەلسەندى تۇردە كەلە باستاعانىن كورىپ وتىرمىز. بۇل پاندەميانى تەك ۇجىمدىق يممۋنيتەتى قانا توقتاتادى دەپ ويلايمىن»، - دەيدى №30 قالالىق ەمحانانىڭ باس مەدبيكەسى گۇلىم ساداقبايەۆا.

قاراپايىم قالا تۇرعىندارى دا دارىگەرلەردىڭ پىكىرىمەن كەلىسەدى. الماتىلىقتار ۆاكسيناسيا ينفەكسيانىڭ تارالۋىن توقتاتۋعا جانە كارانتيندىك شەكتەۋلەردى جويۋعا كومەكتەسەدى دەپ سانايدى.

«مەنىڭ اينالامداعىلاردىڭ بارلىعى ۆاكسينا الدى، ولارعا ەشقانداي جاناما اسەرى بولعان جوق جانە، مەنىڭ ويىمشا، ادامدار كارانتيننەن شارشادى. ءبىز ۆاكسينانى تەزىرەك الساق، ەلدەگى جاعداي تەزىرەك جاقسارادى»، - دەيدى قالا تۇرعىنى ەلەن كويگەلدينا.

«ارينە، مەن بۇرىنعى ومىرىمە، ياعني ماسكاسىز جۇرەتىن كەزگە قايتا ورالعىم كەلەدى. سەبەبى قازىرگىدەي ىستىق كۇندە ماسكامەن ءجۇرۋ قولايسىزدىق تۋدىرادى»، - دەيدى الماتى قالاسىنىڭ تۇرعىنى جانەل وراشيەۆا.