بوستاندىق اۋدانىندا اۋلا اۋماقتارىن جاڭعىرتۋدىڭ جاڭا ستاندارتى ەسكەرىلىپ، جاياۋ جۇرگىنشىلەر ايماعى اباتتاندىرىلدى
الماتىدا «حالىق قاتىساتىن بيۋدجەت» باعدارلاماسى اياسىندا تاعى ءبىر قوعامدىق كەڭىستىك رەتكك كەلتىرىلدى. بۇل الماتى اكىمى ەربولات دوسايەۆ جۇمىس ساپارى كەزىندە بوستاندىق اۋدانىنىڭ تۇرعىندارىمەن كەزدەسۋ بارىسىندا كورىپ شىققان جاياۋ جۇرگىنشىلەر ايماعى، دەپ حابارلايدى aqshamnews.kz.
وربيتا-4 شاعىن اۋدانىنداعى 6 جانە 7 ۇيلەردىڭ اراسىنداعى اۋماقتاعى كورىكتەندىرۋ جۇمىستارى بيىل شىلدە ايىندا باستالىپ، وسى ايدا اياقتالدى.
جاياۋ جۇرگىنشىلەر ايماعىنىڭ بويىنا شاحمات ۇستەلى، سپورت ترەناجەرلەرى مەن ۆوركاۋت ايماقتارى ورناتىلدى. بۇلدىرشىندەر ءۇشىن بالالار ويىن الاڭى جابدىقتالدى. اۋماقتى كورىكتەندىرۋ، ويىن الاڭدارىن، سپورتتىق قۇرالداردى جانە دەمالىس ورىندارىن كوبەيتۋ تۇرعىنداردىڭ كۇندەلىكتى ءومىرىن سان الۋان ءارى قىزىقتى ەتە ءتۇستى.
جوبا اياسىندا 1 817 شارشى مەتر كەسپە تاس، 1 704 شارشى مەتر اسفالت جابىندىسى، 840 شارشى مەتر رەزەڭكە جابىندى توسەلىپ، 175 مەترلىك گابيون قۇرىلىسى سالىندى جانە 42 كوشە شامى ورناتىلدى.
«حالىق قاتىساتىن بيۋدجەت» جوباسى بىزگە ويىمىزدى ۇسىنىپ، جۇزەگە اسىرۋعا مۇمكىندىك بەردى. جاڭارتۋ ناتيجەسىندە ۇيلەرىمىزدىڭ اينالاسى ايتارلىقتاي وزگەرىپ، جايلى ءارى ىڭعايلى ورىنعا اينالدى»، – دەدى اۋدان تۇرعىنى اكىمگە العىسىن ءبىلدىرىپ.
ءوز كەزەگىندە ەربولات دوسايەۆ شاھار تۇرعىندارى ءۇشىن جايلى قالالىق ورتانى دامىتۋ جۇمىستارى جالعاساتىنىن اتاپ ءوتتى.
«جوبا اۋلالىق كەڭىستىكتەردى جاڭعىرتۋعا ارنالعان جاڭا ستاندارتتاردى ەسكەرە وتىرىپ جۇزەگە اسىرىلدى. قالانىڭ جوسپارى اياسىندا ەرەسەكتەر مەن بالالارعا ارنالعان جەكە ايماقتارى بار اۋماقتاردى قايتا قۇرۋ جۇمىستارى قاراستىرىلعان»، – دەدى قالا اكىمى تۇرعىندارمەن كەزدەسۋ كەزىندە.
اۋدان تۇرعىندارىنىڭ وتىنىشىمەن ەربولات دوسايەۆ جاياۋ جۇرگىنشىلەر ايماعى بويىنا بەينەباقىلاۋ كامەرالارىن ورناتۋدى تاپسىردى.
سونداي-اق اۋدان اكىمىنە اۋلا اۋماقتارىن تازالاۋ جۇمىستارىن مەردىگەر ۇيىم تاراپىنان جۇيەلى جانە تولىق قامتاماسىز ەتۋ تاپسىرىلدى.
ايتا كەتەيىك، مەگاپوليستە «حالىق قاتىساتىن بيۋدجەت» باعدارلاماسى بەلسەندى تۇردە جۇزەگە اسىرىلىپ جاتىر. بيىل بۇل جوباعا 18،8 ميلليارد تەڭگە ءبولىندى، بۇل وتكەن جىلمەن سالىستىرعاندا 5،8 ميلليارد تەڭگەگە كوپ. الماتى تۇرعىندارى اۋلالاردى، قوعامدىق كەڭىستىكتەردى كورىكتەندىرۋ، سپورت جانە ويىن الاڭدارىن قۇرۋ بويىنشا 364 جوبانى ۇسىنۋعا جانە جۇزەگە اسىرۋعا مۇمكىندىك الدى.