قالا اكىمىنىڭ تاپسىرماسىمەن مەكتەپتە 35 جىل ىشىندە العاش رەت كۇردەلى جوندەۋ جۇرگىزىلدى.
سونداي-اق، عيماراتتىڭ سەيسميكالىق توزىمدىلىگى كۇشەيتىلدى، دەپ حابارلايدى aqshamnews.kz
الماتى اكىمى ەربولات دوسايەۆ المالى اۋدانىنا جۇمىس ساپارى بارىسىندا №136 گيمنازيا مەكتەبىنىڭ جاڭارتىلعان عيماراتى مەن جەكە ينۆەستيسيا ەسەبىنەن اشىلعان بالاباقشانى كوردى.
ءقازىر 750 وقۋشى ءبىلىم الىپ جاتقان №136 گيمنازيا مەكتەبى 1989 جىلى سالىنعان. ءبىلىم بەرۋ ۇدەرىسى بيىلعى 2 قازاندا قايتا باستالدى.
الماتى اكىمى حيميا، بيولوگيا، فيزيكا، ينفورماتيكا پاندەرىنە ارنالعان جاڭارتىلعان سىنىپتاردى قاراپ شىقتى. بارلىق پاندىك اۋديتوريا ينتەراكتيۆتى پانەلدەرمەن جانە جاڭا جيھازدارمەن جابدىقتالعان. سونىمەن قاتار، ۇيىرمەلەر كابينەتتەرى مەن سپورت الاڭدارى جوندەلىپ، مەكتەپ اۋماعى كوگالداندىرىلىپ، قورشالدى. وسىلايشا، مەكتەپ وقۋشىلارىنىڭ جايلى دەمالۋىنا بارلىق جاعداي جاسالدى.
«مەملەكەت باسشىسى قاسىم-جومارت توقايەۆ ءبىلىم بەرۋ جۇيەسىنە، مەكتەپتەردى كۇردەلى جوندەۋ مەن جاڭا وقۋ ورىندارىن سالۋعا ەرەكشە نازار اۋدارىپ وتىر. سەيسميكالىق توزىمدىلىكتى ارتتىرا وتىرىپ، مەكتەپتەردى قايتا جوندەۋ مەن جاڭعىرتۋ – ءبىزدىڭ باستى باسىمدىقتىڭ ءبىرى. ءبىز باسقا دا ءبىلىم بەرۋ مەكەمەلەرىن جوعارى ساپا ستاندارتتارىن ساقتاي وتىرىپ، جاڭعىرتۋدى جالعاستىرامىز»، – دەدى ەربولات دوسايەۆ.
جالپى، وتكەن جىلى الماتىدا سەيسميكالىق توزىمدىلىكتى ارتتىرۋ جۇمىستارى اياسىندا سەگىز مەكتەپتىڭ جوندەۋى اياقتالدى. مەگاپوليستەگى وقۋشى ورىندارىنىڭ تاپشىلىعىن ازايتۋ ماقساتىندا زەردەلى شاعىن اۋدانىندا ءبىر مەكتەپ، ءتۇرلى اۋدانداردا بەس قوسىمشا عيمارات سالىنۋدا، سونداي-اق التى مەكتەپ كۇردەلى جوندەۋ جانە قايتا جاڭعىرتۋدان ءوتىپ جاتىر. بۇعان قوسا، «جايلى مەكتەپ» ۇلتتىق جوباسى اياسىندا 21 وقۋ ورنىنىڭ قۇرىلىسى جالعاسۋدا.
ەربولات دوسايەۆ جۇمىس ساپارى بارىسىندا بارعان تاعى ءبىر نىسان – SANA URPAQ بالاباقشاسى. بالاباقشا ەكى تۇرعىن ءۇي اراسىنداعى ءبىرىنشى قاباتتا، جەكە ديزاين بويىنشا ورنالاسقان. مەكەمە 11 توپقا ارنالعان جانە جاڭا تەحنولوگيالارمەن جابدىقتالعان: ينتەراكتيۆتى تاقتالار، بەينەباقىلاۋ كامەرالارى، سونداي-اق بالالاردىڭ دەنساۋلىعىن ساقتاۋعا جانە دامۋىنا ارنالعان زاماناۋي قۇرال-جابدىقتارمەن جابدىقتالعان. مۇندا شاحمات، قىش ونەرى، تۇز شاحتاسى، تاەكۆوندو، حورەوگرافيا، گيمناستيكا، مۋزىكا، لوگوپەد جانە پسيحولوگ كابينەتتەرى بار.
الماتى اكىمى اتاپ وتكەندەي، بۇل بالاباقشا – «بارلىق قوعامدىق كەڭىستىك ويلاستىرىلعان جاڭا ۇلگىدەگى ورتالىق».
ەسكە سالايىق، مەكتەپكە دەيىنگى بىلىممەن قامتۋدى ارتتىرۋ ماقساتىندا بيىل الماتىدا مەكتەپكە دەيىنگى تاربيە مەن وقىتۋعا مەملەكەتتىك ءبىلىم بەرۋ تاپسىرىسىن ورنالاستىرۋ بويىنشا 8 577 ورىنعا ءۇش بايقاۋ وتكىزىلدى. 2025 جىلى 1 920 ورىنعا ارنالعان سەگىز مەكتەپكە دەيىنگى ۇيىم اشۋ جوسپارلانىپ وتىر.