قازاقستان رەسپۋبليكاسىنىڭ پرەزيدەنتى جانىنداعى جاستار ساياساتى جونىندەگى كەڭەس ءۇشىن 2023 جىل تابىستى بولدى. بۇل كەڭەس جاستارعا قاتىستى ءبىرقاتار ماڭىزدى ستراتەگيالىق قۇجاتتاردى ازىرلەۋگە اتسالىستى.
اتاپ ايتساق، مەملەكەتتىك جاستار ساياساتىنىڭ 2023 - 2029 جىلدارعا ارنالعان تۇجىرىمداماسى دايىندالدى. بيىل وسى قۇجاتتى جۇزەگە اسىرۋ بارىسىندا جاس ازاماتتاردىڭ كاسىپكەرلىكپەن اينالىسۋىنا جول اشاتىن ماڭىزدى باستاما قولعا الىندى: جالپى سوماسى 26 ميلليارد تەڭگەنى قۇرايتىن 5،6 مىڭ بيزنەس جوبالارى ءۇشىن 2،5% مولشەرلەمەسىمەن جەڭىلدەتىلگەن نەسيە بەرىلەدى. كەلەسى جىلى جاستارعا ارنالعان جەڭىلدەتىلگەن ءتۇرعىن-ۇي باعدارلاماسىن قولعا الۋ جوسپاردا بار.
كەڭەستىڭ تىكەلەي قاتىسۋىمەن ازىرلەنگەن تاعى ءبىر ماڭىزدى قۇجات – ناشاقورلىققا جانە ەسىرتكى بيزنەسىنە قارسى كۇرەستىڭ 2023 - 2025 جىلدارعا ارنالعان كەشەندى جوسپار. سينتەتيكالىق ەسىرتكىگە قارسى ءىس-قيمىلدىڭ ماڭىزدىلىعى العاش رەت كەڭەس الاڭىندا ايتىلعان ەدى. ەندى جوسپاردىڭ ورىندالۋى وسى قۇرىلىمنىڭ تۇراقتى باقىلاۋىندا بولادى.
بۇدان بولەك، كەڭەستىڭ مۇشەلەرى «قازاقستان جاستارى – 2023» اتتى ۇلتتىق باياندامانى ازىرلەۋگە ەلەۋلى ۇلەس قوسقانىن اتاپ وتكىم كەلەدى.
الداعى 2024 جىلى دا كەڭەس جاستارعا قاتىستى وزەكتى ماسەلەلەرمەن بەلسەنە اينالىسىپ، مەملەكەت باسشىسىنىڭ باستامالارىن جۇزەگە اسىرۋعا اتسالىسۋدى جالعاستىراتىن بولادى.
ناقتى ايتقاندا، بۇگىندە كەڭەس لۋدومانيانىڭ تارالۋىنا جول بەرمەۋ ءىسىن مىقتاپ قولعا الدى. وسى ورايدا، ونىڭ مۇشەلەرىنىڭ ۇسىنىسىمەن قۇمار ويىن بيزنەسىنە قارسى ءىس-قيمىل جانە لۋدومانياعا قارسى كۇرەس جونىندە كەشەندى جوسپاردى ازىرلەۋ جۇمىسى باستالدى.