جارىس ناتيجەسىندە التى ۇزدىك كوماندا انىقتالدى
27-29 ناۋرىز ارالىعىندا ماتەماتيكا ءپانى مۇعالىمدەرىنە ارنالعان "ماتەماتيكالىق رەگاتا" رەسپۋبليكالىق وليمپياداسى ءوتتى، دەپ حابارلايدى Almaty-akshamy.kz.
"دارىن" رەسپۋبليكالىق عىلىمي-پراكتيكالىق ورتالىعىنىڭ حابارلاۋىنشا، وليمپياداعا ەلىمىزدىڭ ءار وڭىرىندەگى ءبىلىم بەرۋ ۇيىمدارىنان 23 ۇزدىك كوماندا قاتىستى. ولار ماتەماتيكالىق اناليز نەگىزدەرى، الگەبرا، گەومەتريا جانە لوگيكالىق، كومبيناتورلىق تاپسىرمالار ورىنداپ، سىنعا ءتۇستى.
جارىس قورىتىندىسى بويىنشا، ءبىرىنشى ورىندى الماتى قالاسىنىڭ كومانداسى جەڭىپ الدى. شىعىس قازاقستان وبلىسى مەن جەتىسۋ وبلىسىنىڭ ماتەماتيكتەرى ەكىنشى ورىندى يەلەنسە، ءۇشىنشى ورىندى الماتى، اقتوبە وبلىسى جانە نازاربايەۆ زياتكەرلىك مەكتەپتەر جەلىسىنىڭ پەداگوگتەرى الدى.