كورمەگە سۋرەتشىنىڭ 90 -نان استام كەسكىندەمە جانە گرافيكالىق جۇمىستارى قويىلعان.
مۇراجاي قابىرعاسىندا وتەتىن ەكىنشى جەكە كورمەسىندە سۆەتلانا كاكوتكينا «تەرەزەدەن تىس كورىنىس» اتتى اۆتورلىق ولەڭدەر جيناعىنىڭ دا تۇساۋىن كەسەدى، دەپ حابارلايدى Almaty-akshamy.kz
2021 جىلدىڭ 15 قىركۇيەگىندە ساعات 16.00 -دە ءا.قاستەيەۆ اتىنداعى ق ر مەملەكەتتىك ونەر مۋزەيىنىڭ ورتالىق كورمە زالىندا الماتىلىق سۋرەتشى سۆەتلانا كاكوتكينانىڭ «تەرەزەدەن تىس كورىنىس» اتتى كورمەسىنىڭ اشىلۋى وتەدى.
سۆەتلانا كاكوتكينا 1979 جىلى الماتىدا دۇنيەگە كەلگەن. ول ونەر جولىنداعى باستاپقى ءبىلىمىن كلاسسيكالىق ونەر گيمنازياسىندا العان. گيمنازيانى ءساتتى اياقتاعاننان كەيىن، ول ساۋلەت ينستيتۋتىنا ديزاين بولىمىنە وقۋعا تۇسەدى. وندا كافەدرانىڭ كوپتەگەن بايقاۋلارى مەن كورمەلەرىنە قاتىسادى.
جوعارعى وقۋ ورنىن بىتىرگەننەن كەيىن سۆەتلانا كوركەمسۋرەت مەكتەبىندە ءمۇعالىم، جارناما اگەنتتىكتەرى مەن جۋرنالداردا ديزاينەر، ۇيلەستىرۋشى بولىپ جۇمىس جاسايدى. كەيىنىرەك سۆەتلانا ينتەرەرگە، ۇيلەردىڭ قۇرىلىسى مەن جوندەۋ جۇمىستارىنا قىزىعۋشىلىق تانىتىپ، قىزمەت اياسىن كەڭەيتەدى. سۋرەتشىنىڭ ينتەرەر جۇمىستارى «Ideas»، «Elite House» سياقتى تاقىرىپتىق جۋرنالداردا جاريالانعان.
«كورەرمەندەر نازارىنا «تەرەزەدەن تىس كورىنىس» دەپ اتالاتىن شىعارمالار توپتاماسىن ۇسىنامىن. كارانتيندىك شەكتەۋ شارالارىنان ەركىندىككە شىققىم كەلدى، الايدا قول-اياعىمىز ءجىپسىز بايلانىپ، ۇيدە وتىرۋعا تۋرا كەلدى. سوندىقتان ۇيدەن شىقپاستان، سۇلۋلىقتى ىزدەدىم. ءبىر جىل بۇرىن، كوۆيدتىڭ دۇربەلەڭى مەن قورقىنىشى ەندى باستالعان كەزدە، ماعان شابىتتاندىراتىن، قاناتتاندىراتىن دۇنيەنى تابۋ كەرەك بولدى. تەرەزە توسەنىشتەرى، تەرەزەلەر، ناتيۋرمورتتار، بولمە گۇلدەرى، تەرەزەدەگى كورىنىستەر. ءبىراز ۋاقىتتان كەيىن ساياباقتار مەن تاۋلاردا سەرۋەندەۋگە جانە سۋرەت سالۋعا مۇمكىندىكتەر اشىلدى، ءبىراق شەكتەۋلەر تولىقتاي الىنباعان ەدى. تەرەزەدەن تىس كورىنىس – تەرەزەنىڭ ارعى جاعىنداعى ءومىر. تەرەزە اينەگى - بۇل الەمدەر اراسىنداعى وتكەل - مەنىڭ كەڭىستىگىم مەن ۇلكەن الەم اراسىنداعى شەكارا ىسپەتتەس. ال باستىسى قايسى ەكەنى بەيمالىم – سىرتتاعى الەم بە نەمەسە ىشتەگى مە؟ كەيدە اعاشتار مەن ۇيلەر مەنىڭ جۇمىسىمدا نەگىزگى ورىندى الادى. ادەتتەگى تانىس نارسەلەردەن-اق ۇلكەن شابىت الۋعا بولادى ەكەن. مىسالى، تەرەزەدەگى شەگىرگۇلدەن، جاپىراقتارعا تۇسكەن كۇن ساۋلەسىنەن، تابيعات اياسىنداعى سەرۋەندەردەن. پاندەميادان كەيىنگى كلاۋستروفوبيادان كەيىن الەمگە جاڭاشا كوزقاراسپەن قاراي باستايدى ەكەنسىڭ. مەن ءوز جۇمىستارىمدا كارانتين اياقتالعان كەزدەگى بوستاندىقتىڭ قۋانىشىن، ال شەكتەۋ كەزىندەگى تەرەزەدەگى كورىنىس ارقىلى عانا تاماشالاۋدىڭ ءزىلدى مۇڭىن جەتكىزە الدىم دەپ ۇمىتتەنەمىن»، -دەيدى سۆەتلانا كاكوتكينا.