مەملەكەتتىك باعدارلاما ارقىلى جۇمىس تاپقاندار سانى 300 مىڭنان استى.
جىل باسىنان بەرى جۇمىسسىز جۇرگەن قازاقستاندىقتار «ەڭبەك» باعدارلاماسى ارقىلى ءوز كاسىبىن تاپتى، دەپ حابارلايدى Almaty-akshamy.kz.
«اعىمداعى جىلعى 1 قىركۇيەكتەگى جاعداي بويىنشا، 451،6 مىڭ ادام ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ 2017-2021 جىلدارعا ارنالعان «ەڭبەك» مەملەكەتتىك باعدارلاماسىنىڭ (بۇدان ءارى – «ەڭبەك» مەملەكەتتىك باعدارلاماسى) قاتىسۋشىلارى بولدى. 328،5 مىڭ ادام جۇمىسقا ورنالاستىرىلدى، ونىڭ 200،7 مىڭى تۇراقتى جۇمىسقا تۇردى»، – دەلىنگەن ەڭبەك جانە حالىقتى الەۋمەتتىك قورعاۋ مينيسترلىگىنىڭ باسپا ءسوز قىزمەتىنىڭ حابارلاماسىندا.
رەسمي مالىمەت بويىنشا، باعدارلامانىڭ ءبىرىنشى باعىتى اياسىندا قىسقا مەرزىمدى كۋرستارعا 15،2 مىڭ ادام جىبەرىلگەن. 5،5 مىڭنان استام ادام ءوز ءىسىن اشۋ ءۇشىن جەڭىلدىكتى ميكروكرەديتتەر، ال 20،2 مىڭى قايتارىمسىز مەملەكەتتىك گرانتتار العان.
سۋبسيديالاناتىن جۇمىس ورىندارىنا 155،7 مىڭ ادام جۇمىسقا ورنالاستىرىلدى، ونىڭ ىشىندە: الەۋمەتتىك جۇمىس ورىندارىنا 16،6 مىڭ ادام؛ جاستار پراكتيكاسىنا – 21،4 مىڭ ادام؛ قوعامدىق جۇمىستارعا – 117،4 مىڭ ادام.
«ەڭبەك رەسۋرستارىنىڭ ۇتقىرلىعى شەڭبەرىندە 1 342 وتباسى نەمەسە 4 571 ادام قونىس اۋداردى، ونىڭ ىشىندە 1 952 ادام ەڭبەككە قابىلەتتى جاستا بولىپ تابىلادى. ونىڭ ىشىندە 1 329 ادام جاڭا تۇرعىلىقتى جەرىندە تۇراقتى جۇمىسقا ورنالاستىرىلدى جانە 111 ادام كاسىپكەرلىك قىزمەتپەن اينالىسادى، 5 ادام وقۋعا جىبەرىلدى»،– دەپ حابارلايدى مينيسترلىك ماماندارى.
مينيسترلىك وكىلدەرىنىڭ سوزىنە جۇگىنەتىن بولساق، 2020 جىلى «ەڭبەك» مەملەكەتتىك باعدارلاماسىنا 649 مىڭ ادام قاتىستى. 437،3 مىڭ ادام جۇمىسقا ورنالاستىرىلدى، ونىڭ 319،2 مىڭى تۇراقتى جۇمىسقا تۇردى. جاپپاي كاسىپكەرلىكتى دامىتۋعا 12،7 مىڭ ميكروكرەديت جانە جاڭا بيزنەس-يدەيالاردى ىسكە اسىرۋعا 44،9 مىڭ قايتارىمسىز مەملەكەتتىك گرانت بەرىلدى.