الماتىلىق اسەل سابىرجان قىزى - قارىنداشپەن سۋرەت سالۋدىڭ حاس شەبەرى.
ول ءبىر ۋاقىتتا التى ادامنىڭ كەسكىن-كەلبەتىن سالا الادى. اسەل تانىمال ازاماتتار مەن تاريحي تۇلعالاردى، ءبىر ۋاقىتتا قاعاز بەتىنە ءتۇسىرىپ، كوپتىڭ كوزىنە ءتۇسىپ ءجۇر، دەپ حابارلايدى Almaty-akshamy.kz 24.kz-كە سىلتەمە جاساپ.
جاس سۋرەتشى اسەل سابىرجان قىزى الەۋمەتتىك جەلىدە اسسول ەسىمىمەن تانىمال. ونىڭ تاڭعاجايىپ تالانتى 12 جاسىندا-اق بايقالا باستاپتى. كوركەمسۋرەت شەبەرى ونەر كوللەدجى مەن ۋنيۆەرسيتەتىن ءتامامداعان. اسەل تاپسىرىسپەن سۋرەت سالىپ، تابىس تابادى ەكەن. سۋرەتشىنىڭ سۇيىكتى جانرى – پورترەت.
«مەنى ادامدار شابىتتاندىرادى. تاريحي تۇلعالار جانە باتىر بابالارىمىزدىڭ پورترەتىن سالۋعا تىرىسامىن. سونىمەن قاتار، زاماناۋي سۋرەتتى دە سالامىن. بۇگىنگى كۇننىڭ تانىمال ازاماتتارىن زامانداس سۋرەتشىلەرى كەسكىندەۋى كەرەك»، - دەيدى سۋرەتشى اسەل سابىرجان قىزى.
اسەل 5 جىلدان بەرى گيپەررەاليزم جانرىندا شەبەرلىگىن شىڭداپ كەلەدى. سەبەبى فوتو سياقتى قانىق سۋرەتتەرگە دەگەن سۇرانىس جوعارى ەكەن. ۇنەمى شەبەرلىگىن شىڭداۋعا قۇمار قىز جاقىندا جاڭا دەڭگەيگە جەتكەن. ەندى ول التى قارىنداشپەن ءبىر ۋاقىتتا التى ادامنىڭ پورترەتىن سالا الادى.
«مەن ءار سۋرەتكە 2 سەكۋند شاماسىندا ۋاقىت بولەمىن. ياعني، ءار سۋرەتكە 2 سەكۋندتان نازار اۋدارىپ وتىرامىن. سونىمەن كەزەك-كەزەگىمەن سالا بەرەمىن. ودان كەيىن اياقپەن سۋرەت سالۋ باستالادى. ءبىرىنشى سول اياق، ودان كەيىن وڭ اياقپەن جۇمىس جاسايمىن. التى سۋرەت وسىلايشا سالىنادى»، - دەيدى سۋرەتشى.
اسەل ءوزىنىڭ شىعارماشىلىق جۇمىستارىن الەۋمەتتىك جەلىدە جاريالاپ وتىرادى. جاس سۋرەتشىنىڭ ەندىگى ماقساتى - شەبەرلىگىن شىڭداپ فوتودان ايىرماشىلىعى مۇلدەم از سۋرەتتەر سالۋ.