وتانعا دەگەن سۇيىسپەنشىلىك
الماتى وبلىسى پد باستىعى ىشكى ىستەر ورگاندارىنىڭ قۇرمەتتى ارداگەرىن 100 جىلدىق مەرەيتويىمەن قۇتتىقتادى، دەپ حابارلايدى Almaty-akshamy.kz.
بۇگىن ۇوس قاتىسۋشىسى، ىشكى ىستەر ورگاندارىنىڭ قۇرمەتتى ارداگەرى، ءقازىر الماتى وبلىسىنىڭ ىلە اۋدانىندا تۇراتىن وتستاۆكاداعى ميليسيا پولكوۆنيگى تاڭىربەرگەن تولعانبايەۆتى 100 جىلدىق مەرەيتويىمەن الماتى وبلىسى پد باستىعى قۇتتىقتادى.
«ق ر ىشكى ىستەر ءمينيسترى مارات احمەتجانوۆتىڭ اتىنان مەرەيتوي يەسىنە قۇرمەت گراموتاسىن تابىستاپ، جىلى لەبىزىمىز بەن اقجارما تىلەكتەرىمىزدى جەتكىزدىك. اتالعان ءىس-شارالار ءبىز ءۇشىن، وسكەلەڭ ۇرپاق ءۇشىن ناعىز باتىلدىق پەن ەرلىكتىڭ كورىنىسى، وتانعا دەگەن سۇيىسپەنشىلىكتىڭ بەلگىسى ەكەنىن اتاپ وتكىم كەلەدى»، - دەدى الماتى وبلىسى پد باستىعى باۋىرجان الەنوۆ.
تاڭىربەرگەن تولعانبايەۆ 1923 جىلى 1 مامىردا تالدىقورعان وبلىسى اقسۋ اۋدانىندا دۇنيەگە كەلگەن. 1942 جىلى مامىردا كەڭەس ارمياسىنىڭ قاتارىنا شاقىرىلعان.
1951 جىلى ىشكى ىستەر ورگاندارىنداعى قىزمەتىن باستاپ، 1975 جىلعا دەيىن ءارتۇرلى لاۋازىمداردا جۇمىس اتقارعان.
سوڭعى لاۋازىمى: الماتى وبلىسى جامبىل اۋدانىنىڭ ىشكى ىستەر ءبولىمىنىڭ باستىعى.