V دۇنيەجۇزىلىك كوشپەندىلەر ويىندارىنا دايىندىق باستالدى
1 مامىر - قازاقستان حالقىنىڭ بىرلىگى مەرەكەسىنە وراي الماتى وبلىسى تالعار اۋدانىنداعى قوبىلاندى باتىر اتىنداعى يپپودرومىندا ق ر مادەنيەت جانە سپورت مينيسترلىگى مەن ق ر اقپارات جانە قوعامدىق دامۋ مينيسترلىگىنىڭ قولداۋىمەن ۇشقىر بايگەدەن Qazaq World Cup ءتۋرنيرى ءوتتى.
اتالمىش جارىستى ق ر ۇلتتىق سپورت قاۋىمداستىعى، الماتى وبلىسىنىڭ اكىمدىگى، رەسپۋبليكالىق «بايگە» فەدەراسياسى، «قازاق جوكەي كلۋبى» قوعامدىق ۇيىمى مەن «Bayserke Agro» حولدينگى ۇيىمداستىردى.
ءتۋرنيردىڭ اشىلۋىنا الماتى وبلىسىنىڭ اكىمى مارات سۇلتانعازييەۆ، ق ر مادەنيەت جانە سپورت ۆيسە-مينيسترى سارسەن قۇرانبەك جانە ق ر ۇلتتىق سپورت قاۋىمداستىعىنىڭ پرەزيدەنتى يسلامبەك سالجانوۆ ارنايى قاتىستى.
جارىستىڭ سالتاناتتى اشىلۋىندا ءسوز العان الماتى وبلىسىنىڭ اكىمى م. سۇلتانعازييەۆ كورەرمەندەردى 1 مامىر مەرەكەسىمەن قۇتتىقتاپ، تۋرنير قاتىسۋشىلارىنا ساتتىلىك تىلەدى.
«بايگە بەرىپ، ات شاپتىرۋ - ەلىمىزدىڭ ەجەلدەن كەلە جاتقان ءداستۇرى. شاراعا كەلگەن مەيمانداردىڭ قاراسى سونىڭ ايقىن نىشانى دەپ بىلەمىن. بۇگىنگى تاڭدا الماتى وبلىسىندا ۇلتتىق سپورت تۇرلەرىنەن 39 291 سپورتشى جاتتىعاتىن 774 سەكسيا بار. Qazaq world cup ءتۋرنيرى الماتى وبلىسىندا ۇلتتىق سپورتتىڭ كەڭىنەن دارىپتەلۋىنە سەپتىگىن تيگىزەدى دەپ بىلەمىن»، - دەدى ءوز سوزىندە مارات ەلەۋسىز ۇلى.
ق ر مادەنيەت جانە سپورت ۆيسە-مينيسترى سارسەن قۇرانبەك كەلەسى جىلى ەلىمىزدە وتەتىن V دۇنيەجۇزىلىك كوشپەندىلەر ويىندارىنا دايىندىق جۇمىستارى قازىردەن قىزۋ باستالىپ كەتكەنىن جەتكىزدى.
«مەملەكەت باسشىسى قاسىم-جومارت توقايەۆ جالپى سپورتتىڭ، ونىڭ ىشىندە ۇلتتىق سپورتتىڭ دامۋىنا ەرەكشە كوڭىل ءبولىپ وتىر. ءبىز كەلەسى جىلى ەلىمىزدە V دۇنيەجۇزىلىك كوشپەندىلەر ويىندارىن وتكىزەمىز. وعان الەمنىڭ 100-دەن اسا ەلدەرى كەلەدى دەپ كۇتىلۋدە. بۇل ءىس-شارانى ءبىز وتە جوعارى دەڭگەيگە وتكىزۋىمىز ءتيىس. ول – بىزگە ارتىلعان نەگىزگى مىندەت بولىپ تابىلادى. سوندىقتان بۇگىنگى ۇيىمداستىرىلىپ جاتقان ۇشقىر بايگەدەن Qazaq World Cup جارىسى كوشپەندىلەر ويىندارىنا دايىندىعىمىز دەپ بىلەمىن»،- دەدى سارسەن اباي ۇلى.
ال، ق ر ۇلتتىق سپورت قاۋىمداستىعىنىڭ پرەزيدەنتى يسلامبەك سالجانوۆ جارىستىڭ ماڭىزدىلىعىنا توقتالدى.
«جالپى، ات بايگەسى قازاق دالاسىندا ەرتەدەن جالعاسىپ كەلە جاتقان ۇلتتىق سپورت تۇرلەرىنىڭ ءبىرى ەكەنى بارشامىزعا بەلگىلى. بۇگىندە بايگە سپورتى قاناتىن كەڭگە جايىپ، بۇقارالىق سيپاتقا يە بولىپ وتىر. بۇگىنگى تاڭدا ۇلتتىق سپورتىمىزدىڭ دامۋى، ونىڭ الەمگە ناسيحاتتالۋى مەملەكەت باسشىسى قاسىم-جومارت توقايەۆتىڭ ءجىتى نازارىندا. اتبەگىلىك – اتادان قالعان كاسىپ ءارى ونەر. قازىرگى تاڭدا جاستارىمىزدىڭ اراسىندا تاي جاراتىپ، جىلقى باپتاۋعا دەن قويعاندار قاتارى كوبەيىپ جاتقانىنا ءوز باسىم وتە قۋانىشتىمىن! وسىنداي دودالار ارقىلى ءبىز الەمدىك ارەنالارعا شىعاتىنىمىزعا سەنىمدىمىن!» - دەدى يسلامبەك تولەيباي ۇلى.
ايتا كەتەيىك، بايگە جەڭىمپازدارى كۋبوكپەن جانە قوماقتى جۇلدەلەرمەن ماراپاتتالدى. ودان بولەك، كورەرمەندەر اراسىندا «ەڭ ۇزدىك ۇلتتىق كيىم»، ارقان تارتۋ، قىز قۋۋ، اسىق اتۋ سىندى ويىنداردان سايىستار ءوتىپ، سوڭى ەلىمىزگە تانىمال ونەر جۇلدىزداردىڭ قاتىسۋىمەن كونسەرتتىك باعدارلاماعا ۇلاستى.