2026 جىلعى 31 قاڭتاردا قازاقستاندىقتارعا جاڭا كونستيتۋسيانىڭ جوباسى ۇسىنىلىپ، ونى ساراپشىلار قاۋىمداستىعى دا، الەۋمەتتىك جەلىدە دە تالقىلاي باستادى. وڭىرلىك كوممۋنيكاسيالار قىزمەتىنىڭ الاڭىندا قۇجات بايىپتى ءارى مازمۇندى تالداۋ فورماتىندا قارالدى. كونستيتۋسيالىق كەڭەستىڭ مۇشەسى، ساياساتتانۋشى ءارى قوعام قايراتكەرى مارات شيبۇتوۆ جوباعا قاتىستى ايتىلعان سىنعا پىكىر ءبىلدىرىپ، وعان بايلانىستى تاراپ جاتقان نەشە ءتۇرلى قاۋەسەتتىڭ شىندىققا جاناسپايتىنىن بىردەن ايتتى.
ساراپشىنىڭ ايتۋىنشا، الەۋمەتتىك جەلىدەگى پىكىردىڭ ءبىرازى سەنىمسىز اقپاراتقا نەگىزدەلىپ جازىلىپتى.
«كونستيتۋسيادا نە جازىلعانىن ءوزىمىز بىلمەي وتىرعاندا، جوبانىڭ ءوزى ءالى قولىمىزعا تيمەگەن كەزدە نەشە ءتۇرلى نارسەنى ويدان شىعارىپ جاتقانداردى كورىپ كۇلكىم كەلدى. ەشكىم كوزبەن كورىپ، قولمەن ۇستاماعان ءماتىن تۋرالى ءبارى بىلگىشسىنىپ جاتتى. مۇنداي وتىرىك اقپاراتتى ءوز ارامىزدا دا، شەتەلدە وتىرىپ تاراتقاندار دا كوپ بولدى»، – دەپ اتاپ ءوتتى مارات شيبۇتوۆ.
قانشاما لايك جيناپ، ەڭ كوپ تالقىلانعان سونداي جازبالاردى جوبانىڭ ماتىنىمەن تانىسپاعاندار جازعانىن ايتادى.
«ەڭ العاشقى ءارى ەڭ كەڭ تاراعان فەيك – شەتەلدىكتەرگە جەر ساتۋعا رۇقسات بەرىلەدى دەگەن اڭگىمە بولدى. ءبىراق جەر مەن تابيعي رەسۋرستار تۋرالى باپ وزگەرگەن جوق، شەتەلدىكتەرگە جەر ساتۋعا بۇرىن قالاي تىيىم سالىنسا، سولاي قالدى. مۇنداي اقپاراتتىڭ قايدان شىققانىن بىلمەيمىز»، – دەيدى سپيكەر.
ونىڭ ايتۋىنشا، باس-اياعى جوق باسقا تاقىرىپتاردىڭ توڭىرەگىندە دە وسىنداي قىزۋ پىكىرتالاس بولىپتى.
«ءتىلدىڭ مارتەبەسى وزگەرەدى ەكەن دەگەندەرى دە بولدى، بۇل باپ تا وزگەرگەن جوق. كەيىن دەسەنتراليزاسيا تۋرالى ايتىلدى، ءبىراق جەرگىلىكتى ءوزىن-وزى باسقارۋ مەن مەملەكەتتىك باسقارۋ ءبولىمى سول كۇيى قالدى. ميتينگىلەردى شەكتەيدى ەكەن دەگەن اڭگىمە شىقتى ءبىر كەزدە، ءبىراق جيىن بوستاندىعى زاڭمەن رەتتەلەدى دەگەن تۇجىرىم بۇرىنعىشا وزگەرىسسىز قالدى»، – دەپ ءتۇسىندىردى شيبۋتوۆ.
ساراپشى قۇجاتپەن جۇمىس ىستەۋدىڭ الداعى كەزەڭدەرى تۋرالى دا ايتىپ ءوتتى.
«كونستيتۋسيالىق كوميسسيانىڭ مۇشەلەرى رەتىندە ءبىز ەرتەڭ استانادا بولامىز، 3 اقپاندا كەزەكتى وتىرىس وتەدى. ءبىز العاشقى جوبا بويىنشا ۇسىنىستاردى جيناقتاپ، تۇزەتۋىمىزدى ەنگىزەمىز، ويتكەنى تۇتاس ءماتىن سالىستىرمالى كەستەگە قاراعاندا باسقاشا قابىلدانادى. مەنىڭ ويىمشا، جوبانىڭ ەكىنشى نۇسقاسى پايدا بولادى، سودان كەيىن ونى پرەزيدەنتكە بەكىتۋگە جىبەرەدى دە، كەيىن رەفەرەندۋم وتەتىن كۇندى بەلگىلەيدى»، – دەيدى.
جاڭا كونستيتۋسيا جوباسىن تالقىلاۋ جالعاسىپ جاتىر. ساراپشىلاردىڭ پىكىرىنشە، ازاماتتاردىڭ بۇل پروسەسكە قاتىسۋى ەلدىڭ بولاشاق دامۋىنا باعىتتالعان نەگىزگى زاڭدى قالىپتاستىرۋدىڭ ماڭىزدى بولىگىنە اينالىپ وتىر.