2026 جىلعى 31 قاڭتاردا قازاقستاندا جاڭا كونستيتۋسيانىڭ جوباسى تانىستىرىلىپ، ول بىردەن كۇن تارتىبىندەگى نەگىزگى قوعامدىق-ساياسي تاقىرىپتاردىڭ بىرىنە اينالدى. وڭىرلىك كوممۋنيكاسيالار قىزمەتىنىڭ الاڭىندا جوبا ساياسي ۇرانسىز، ءمان-ماعىناعا، قۇندىلىقتار مەن قوعامداعى سۇرانىسقا باسىمدىق بەرىلگەن ساراپتامالىق فورماتتا تالقىلاندى. ساياساتتانۋشى، قوعام قايراتكەرى، جاڭا كونستيتۋسيا جوباسىن ازىرلەۋ جونىندەگى جۇمىس توبىنىڭ مۇشەسى مارات شيبۇتوۆ وسى تۋرالى پىكىر ءبولىستى.
ونىڭ ايتۋىنشا، قۇجاتپەن جۇمىس ىستەۋدى بىلتىرعى كۇزدە قولعا العان.
«مەن پارلامەنتتىك رەفورماعا قاتىستى جۇمىس توبىنىڭ قۇرامىندا بولدىم، جاڭا كونستيتۋسيانىڭ ماسەلەسىمەن دە قازان ايىنان بەرى اينالىسىپ كەلە جاتىرمىز. الدىمەن پارلامەنتكە، پرەزيدەنت پەن ۇكىمەتكە ارنالعان بولىمدەرمەن جۇمىس ىستەدىك. كونستيتۋسيا بويىنشا جۇمىس باستالعان كەزدە باسقا بولىمدەردى دە قايتادان وي ەلەگىنەن وتكىزدىك»، – دەپ اتاپ ءوتتى.
ساراپشىنىڭ ايتۋىنشا، نەگىزگى زاڭدى تولىق قايتا قاراعاننان كەيىن وسىنداي جاڭا جوبا جارىققا شىعىپتى.
«1995 جىلعى كونستيتۋسياعا بيىل 30 جىل تولادى، وسى ۋاقىت ىشىندە ونى شامامەن جەتى رەت وزگەرتتى، ونىڭ ىشىندە ءتورت رەت ۇلكەن تۇزەتۋ ەنگىزىلدى. نەگىزىنەن ولار پرەزيدەنت پەن پارلامەنتكە قاتىستى ەدى، ال “جالپى ەرەجەلەر” مەن “ادام جانە ونىڭ قۇقىقتارى” ءبولىمى ءىس جۇزىندە وزگەرىسسىز قالدى. بۇل جولى ءبىز قۇندىلىقتار مەن باسىمدىقتارعا سانالى تۇردە نازار اۋدارىپ، ولاردى قازىرگى زامانعا سايكەستەندىردىك»، – دەدى شيبۇتوۆ.
بۇرىنعى كونستيتۋسيانىڭ ءبىراز نورماسى ەسكىرىپ، جاڭارتۋدى قاجەت ەتكەن.
«حات-حابار الماسۋ، تەلەگراف دەگەن سياقتى كونەرگەن سوزدەر بولدى. 49 جىلدا ءوزىم ءبىر جەدەلحات جىبەرىپ كورمەپپىن. سوندىقتان كونستيتۋسياعا قۇقىقتىق قۇجات دەپ قانا قاراماي، ونداعى مەملەكەت پەن قوعام اراسىنداعى قاتىناستى، ونىڭ قۇندىلىقتارىن قايتا پايىمدادىق»، – دەيدى ساياساتتانۋشى.
مارات شيبۇتوۆ جاڭا جوبانىڭ 1995 جىلعى كونستيتۋسيادان تۇبەگەيلى ايىرماشىلىعىنا دا نازار اۋداردى.
«1995 جىلعى كونستيتۋسيا 1994 جىلعى ساياسي داعدارىسقا جاۋاپ رەتىندە قابىلدانىپ، جاس مەملەكەت ارناپ ازىرلەندى. 2026 جىلعى كونستيتۋسيا – بۇل قالىپتاسقان ەلدىڭ قۇجاتى. ول بولاشاققا باعىتتالعان، مەملەكەت پەن قوعامنىڭ دامۋى قانداي بولاتىنىن، نەگە ۇمتىلاتىنىمىزدى جانە قانداي باعىتتى تاڭدايتىنىمىزدى كورسەتەدى»، – دەپ تۇيىندەدى ول.
ساراپشىلار، ازاماتتىق قوعام وكىلدەرى مەن عىلىمي قاۋىمداستىقتىڭ مۇشەلەرى جاڭا كونستيتۋسيانىڭ جوباسىن ءالى تالقىلاپ جاتىر.