قاراسۋ شاعىن اۋداننىڭ 12 مىڭنان استام تۇرعىنى ورتالىقتاندىرىلعان قالالىق سۋ بۇرۋ جەلىلەرىمەن قامتىلاتىن بولادى، دەپ حابارلايدى Almaty-akshamy.kz
الماتى اكىمى ەربولات دوسايەۆ الاتاۋ اۋدانىن ارالاعان جۇمىس ساپارى كەزىندە قاااسۋ شاعىن اۋدانىنداعى ەكى كارىز-سورعى ستانسياسىنىڭ (كسس) قۇرىلىس بارىسىمەن تانىستى.
قاراسۋ شاعىن اۋدانىنداعى سۋمەن جابدىقتاۋ جەلىلەرىندەگى قۇرىلىس-مونتاج جۇمىستارى 2019 جىلى الماتى قالاسى ەنەرگەتيكا جانە سۋمەن جابدىقتاۋ باسقارماسىنىڭ تاپسىرىسى بويىنشا باستالدى. جەر بەدەرىنىڭ تەگىس ەمەستىگى سالدارىنان قولدانىستاعى كوللەكتورداعى اعىن سۋلاردى بۇرۋ ءۇشىن 11 مەتر تەرەڭدىكتە ەكى كارىز جانە سورعى ستانسيالارىن سالۋ قاجەت بولدى. شۇڭقىردى قازۋ كەزىندە مەردىگەر ۇيىم جەر استى سۋلارىنىڭ ۇلكەن اعىنىنا تاپ بولدى. جوبالىق شەشىممەن سۋدى بۇرۋ ءۇشىن سكۆاجينانى قوسىمشا بۇرعىلاۋ قاراستىرىلعان. جاقىن ارادا مەردىگەر ۇيىم كسس مونتاجداۋعا كىرىسەدى. نىساندى تاپسىرۋدىڭ جاڭا مەرزىمدەرىنە سايكەس جۇمىستاردى 2023 جىلدىڭ سوڭىنا دەيىن اياقتاۋ جوسپارلانۋدا.
الاتاۋ اۋدانىنىڭ اكىمى ازامات قالدىبەكوۆ مەگاپوليس باسشىسىنا شاعىن اۋدان تۇرعىندارىن ورتالىق ينجەنەرلىك جەلىلەرمەن قامتۋ ناتيجەلەرى مەن جوسپارلارى تۋرالى باياندادى. اعىمداعى جوبا اياسىندا كوممۋنيكاسيالار قۇرىلىسى بويىنشا 25 كم سۋ قۇبىرى جۇرگىزىلدى. سۋ بۇرۋ جۇمىستارى ءىس جۇزىندە اياقتالدى،قالعانى 140 م.وسىلايشا، ورتالىق جەلىلەرمەن 12 مىڭعا جۋىق ادامدى قامتي وتىرىپ، 2 مىڭعا جۋىق جەكە تۇرعىن ءۇي قامتاماسىز ەتىلەدى.
ەربولات دوسايەۆ اۋداندىق اكىمدىككە جانە ەنەرگەتيكا جانە سۋمەن جابدىقتاۋ باسقارماسىنا جۇمىستاردى بەلگىلەنگەن مەرزىمگە سايكەس اياقتاۋ ۇدەرىسىن باقىلاۋدى جانە ساپانى تەكسەرۋدى جۇزەگە اسىرۋدى تاپسىردى.