تۋريستەر قايتار جولدا اداسىپ، قاراڭعىدا تومەنگە تۇسە الماعان
2023 جىلعى 26 ناۋرىزدا ساعات 23:32-دە الماتى تجد كەزەكشى-ديسپەچەرلىك بولىمىنە "ايۋساي" شاتقالى مەن سارقىراماسىنىڭ اۋماعىندا تاۋدا ەر ادام مەن ايەل ادام جوعالىپ كەتتى دەگەن حابارلاما كەلىپ تۇسكەن، دەپ حابارلايدى Almaty-akshamy.kz.
الماتى توتەنشە جاعدايلار دەپارتامەنتىنىڭ باسپا ءسوز قىزمەتىنىڭ مالىمەتىنشە، تۋريستەر قايتار جولىنان اداسىپ، قاراڭعىدا تومەنگە تۇسە الماعان. ولار وزدەرى كومەك سۇراپ حابارلاسقان.
"اداسقانداردىڭ ورنالاسقان جەرى تۋرالى مالىمەت الماتى اكىمدىگى قۇتقارۋ قىزمەتىنىڭ جەدەل كەزەكشىسىنە جىبەرىلدى. 4 قۇتقارۋشى ءبىر تەحنيكامەن ىزدەۋ-قۇتقارۋ جۇمىستارىنا جولعا شىقتى. ىزدەۋ ورنىنا كەلگەن كەزدە، ادامداردىڭ ىزدەرى بولعان جوق، اتالعان جەردە از كولەمدى كوشكىن بولدى"، - دەلىنگەن حابارلامادا.
ارادا ءبىر ساعات وتكەننەن كەيىن، جوعالعان ەر ادام تجد كەزەكشى بولىمىنە قايتا قوڭىراۋ شالىپ، ولار جولدى تاۋىپ، كوتەرىلە باستاعاندارىن حابارلاعان، ءسويتىپ، بايلانىس قايتادان ۇزىلگەن. تۇندە ساعات 4:20-دا "ايۋساي" شاتقالىنا قوسىمشا قۇتقارۋ قىزمەتىنىڭ جانە كسپ "تۇيىق-سۋ" 7 قۇتقارۋشىسى مەن 2 بىرلىك تەحنيكاسى جىبەرىلگەن. تۋريستەر قايتىپ بايلانىسقا شىقپاعان.
"06.00-دە تجم رەسپۋبليكالىق جەدەل-قۇتقارۋ جاساعىنىڭ 7 ادامنان قۇرىلعان جەدەل توبىن، ونىڭ ىشىندە ءبىر كينولوگيالىق ەسەپتى ىزدەۋگە جىبەرۋ تۋرالى شەشىم قابىلداندى. رەسپۋبليكالىق جەدەل-قۇتقارۋ جاساعىنىڭ قۇتقارۋشىلارى سپۋتنيكتىك بايلانىسپەن جاراقتالعان. كوسموستانسياعا كەلگەن رەسپۋبليكالىق جەدەل-قۇتقارۋ جاساعىنىڭ قۇتقارۋشىلارى شاتقالدان تومەن قاراي ىزدەۋ جۇمىستارىن جۇرگىزە باستادى. تاۋلىكتىڭ قاراڭعى ۋاقىتىندا، ءقاۋىپتى تىك بەتكەيلەرمەن، تومەنگى تەمپەراتۋرادا جوعالعان تۋريستەردى ىزدەۋ جۇمىستارى توقتاعان جوق"، - دەلىنگەن حابارلامادا.
ىزدەۋ جۇمىستارى تاڭ بويى جالعاسقان. ساعات 09:57-دە قۇتقارۋ قىزمەتىنىڭ ىزدەستىرۋ توبى تۋريستەردى تاۋدىڭ جوتاسىنداعى ءبىرىنشى سارقىرامادان جوعارى ورنالاسقان "ايۋساي" شاتقالىنان تاپتى. زارداپ شەككەندەرمەن ۆيزۋال بايلانىس ورناتىلدى. سودان كەيىن قۇتقارۋ وپەراسياسى جالعاستىرىلدى. جۇمىستى تىك بەتكەيلەر مەن قاردىڭ كوپتىگى قيىنداتتى.
ساعات 15:45-تە قۇتقارۋ قىزمەتىنىڭ قۇتقارۋشىلارى مەن رەسپۋبليكالىق جەدەل-قۇتقارۋ جاساعىنىڭ جەدەل توبى زارداپ شەككەندەردى اپاتتار مەديسيناسى ورتالىعىنىڭ دارىگەرلەر بريگاداسىنا جەتكىزدى. زارداپ شەككەندەر مەديسينالىق كومەككە مۇقتاج ەمەس.