بيزنەس-جوبانى سۇيەمەلدەۋگە Qoldaý كاسىپكەرلىك ورتالىعىنان كومەك بەرىلگەن.
«بجك-2025» باعدارلاماسى اياسىندا الماتى قالاسىنىڭ تۇرعىنى بيبىگۇل نۇربەكوۆا 2 ملن تەڭگە كولەمىندە يننوۆاسيالىق گرانت ۇتىپ الدى، دەپ حابارلايدى Almaty-akshamy.kz Almaty.tv كانالىنا سىلتەمە جاساپ.
جەكە كاسىپكەر مەملەكەتتەن الىنعان قاراجاتقا تىگىن ماشينالارى مەن شيكىزات – ساتىلار، دوڭگەلەكتەر، بەلدىكتەر جانە باسقا دا بۇيىمداردى تىگۋ ءۇشىن تەرى ساتىپ الدى.
گرانت يەگەرىنىڭ ايتۋىنشا، قولونەر بيزنەسى وعان مۇرا بولىپ قالعان. نۇربەكوۆتەر وتباسى ۇلتتىق بۇيىمدار جاساۋمەن اينالىسىپ وتىرعان ءتورتىنشى ۇرپاق.
«ءبىز ۇلكەن وتباسىمىز، باۋىرلارىم، ولاردىڭ ايەلدەرى، جيەندەرىم وسى بيزنەستىڭ ەسەبىنەن ءومىر سۇرەدى. بارلىق ۇلكەندى-كىشىلەرىنىڭ ءبارى. بۇل وتە اۋىر، قولمەن جاسالاتىن جۇمىس. الدىمەن ءبىز بولاشاق ەر-توقىمنىڭ نەگىزىن اعاشتان كەسىپ الامىز، تەرىنى ءوزىمىز وڭدەيمىز، ونى يلەيمىز. مەتالل بولشەكتەرىن دانەكەرلەۋ ارقىلى دايىندايمىز»، – دەيدى بيبىگۇل نۇربەكوۆا.
قولونەرشىنىڭ ايتۋىنشا، ءبىر ەر-توقىمدى جاساۋ كەيدە ءۇش كۇنگە دەيىن سوزىلادى ەكەن.
«ەر-توقىمنىڭ قۇنى 25 مىڭنان ميلليون تەڭگەگە دەيىن وزگەرەدى. التىن، كۇمىس جانە قىمبات مەتالدارمەن قاپتالعان تازا بىلعارىدان جاسالعان ەڭ قىمبات ەر-توقىمدارعا اسىل تۇقىمدى جىلقىلاردىڭ يەلەرى تاپسىرىس بەرەدى. تاپسىرىستار قازاقستاننىڭ بارلىق ايماقتارىنان، سونداي-اق، ءازىربايجاننان، ارمەنيادان، قىتايدان، موڭعوليادان كەلەدى»، -دەيدى كاسىپكەر.