Mitsubishi اۆتوكولىگىن ماس كۇيىندە باسقارعان جانە جول قوزعالىسىنا قاتىسۋشىلارعا ناقتى ءقاۋىپ توندىرەتىن زاڭسىز ارەكەت جاساعانى ءۇشىن 48 جاستاعى پ.ەسىمدى ازامات ۇستالدى، دەپ حابارلايدى Almaty-akshamy.kz Polisia.kz-كە سىلتەمە جاساپ.
«اتالعان كولىكتى “بۋران-305” پاترۋلدىك ەكيپاجىنىڭ مۇشەلەرى جانسۇگىروۆ پەن بۋرۋندايسكايا كوشەلەرىنىڭ قيىلىسىندا ۇستادى. جۇرگىزۋشىدەن الكوگولدىڭ ءيىسى قاتتى شىعىپ تۇردى، ونىڭ ءوزى دە ماس كۇيىندە رولگە وتىرعانىن مويىندادى. مەديسينالىق تەكسەرۋ ورتاشا دارەجەدەگى الكوگولدىك ماساڭدىقتى كورسەتتى. جۇرگىزۋشى كولىك جۇرگىزۋدەن شەتتەتىلدى. وعان قاتىستى ق ر اقبتك-نىڭ 608-بابى 1 بولىگى بويىنشا حاتتاما تولتىرىلدى. كولىك مامانداندىرىلعان ايىپپۇل تۇراعىنا قويىلدى»، – دەدى تۇركسىب اۋداندىق پوليسيا باسقارماسىنىڭ باستىعى ەركىن امانتايەۆ.
مامانداندىرىلعان اۋدانارالىق اكىمشىلىك سوتىنىڭ شەشىمىمەن پ.ەسىمدى ازامات، 7 جىل مەرزىمگە كولىك قۇرالىن باسقارۋ قۇقىعىنان ايىرىلىپ، 15 تاۋلىككە اكىمشىلىك قاماققا الىندى.