سەنات وتىرىسىنان كەيىن وتكەن باق-قا ارنالعان بريفينگ بارىسىندا ق ر پرەمەر-مينيسترى ءاليحان سمايىلوۆ مەملەكەت باسشىسىنىڭ رەسپۋبليكاداعى ينفلياسيانى ەكى ەسە تومەندەتۋ تۋرالى تاپسىرماسىنىڭ ورىندالۋ بارىسى تۋرالى ايتىپ بەردى، دەپ حابارلايدى almaty-akshamy.kz
پرەمەر-مينيستر جىلدىق ينفلياسيا اقپان ايىندا شارىقتاۋ شەگىنە جەتىپ، قازان ايىنىڭ قورىتىندىسى بويىنشا 10،8%-عا دەيىن تومەندەگەنىن اتاپ ءوتتى.
«بۇگىنگى تاڭدا ينفلياسيانىڭ ەكى ەسە تومەندەگەنىن بايقاپ وتىرمىز. جىل سوڭىنا دەيىن ونىڭ دەڭگەيى 10%-دان تومەن بولادى دەپ بولجايمىز. بۇل ۇكىمەت پەن ۇلتتىق بانك جۇزەگە اسىرىپ جاتقان ءتيىستى شارالار كەشەنى ناتيجە بەرە باستاعانىن كورسەتەدى»، — دەدى ءاليحان سمايىلوۆ.
ماسەلەن، تۇراقتاندىرۋ قورلارىنىڭ قىزمەتى قايتا ۇيىمداستىرىلدى. اۋىل شارۋاشىلىعى تاۋارىن وندىرۋشىلەردى قارجىلاندىرۋعا باسىمدىق بەرىلدى، بۇل وتاندىق ءوندىرىستى قولداۋعا، ەكونوميكانىڭ وسى سەكتورىن دامىتۋعا جانە نارىقتاعى باعانى تۇراقتاندىرۋعا ىقپال ەتتى. سونداي-اق ماۋسىمارالىق كەزەڭدە باعانى تۇراقتاندىرۋ ءۇشىن تاۋارلىق ينتەرۆەنسيالار جۇزەگە اسىرىلۋدا.
وعان قوسا وڭىرلىك كوميسسيالاردىڭ باقىلاۋ قىزمەتى جولعا قويىلدى. جالپى مىڭعا جۋىق دەلدالدىق سحەمالار انىقتالدى.
سونىمەن قاتار حالىقتى ارزانداتىلعان ازىق-تۇلىكپەن قامتاماسىز ەتۋ ءۇشىن ەلىمىزدىڭ بارلىق وڭىرىندە اپتا سايىن اۋىل شارۋاشىلىعى جارمەڭكەلەرى وتكىزىلەدى. ۇن مەن الەۋمەتتىك نان باعاسىنىڭ ءوسۋىن تەجەۋ ماقساتىندا «ازىق-تۇلىك كورپوراسياسى» قورلارىنان وڭىرلەرگە ارزانداتىلعان استىقتى جەتكىزۋ بويىنشا شارالار قابىلدانىپ جاتىر.
پرەمەر-مينيستر ورتا مەرزىمدى پەرسپەكتيۆادا ينفلياسيانى تاعى 2 ەسەگە، ياعني 2026 جىلى 5%-عا دەيىن تومەندەتۋ جونىندەگى جۇمىس جالعاساتىنىن اتاپ ءوتتى.