الماتىدا وتكەن جىلمەن سالىستىرعاندا 2023 جىلى اعاشتاردىڭ قۇلاۋ فاكتىلەرى 4 ەسە تومەندەدى، دەپ حابارلايدى almaty-akshamy.kz.
جاسىل جەلەكتەردى ينۆەنتاريزاسيالاۋ ناتيجەلەرى بويىنشا الماتىدا 84 مىڭنان استام اپاتتى اعاش بار. تۇرعىنداردىڭ قاۋىپسىزدىگىن قامتاماسىز ەتۋ ماقساتىندا قالا اكىمدىگى وسىنداي اعاشتاردى كەسۋ بويىنشا كەشەندى جۇمىستار جۇرگىزۋدە. الماتىنىڭ ەكولوگيا جانە قورشاعان ورتا باسقارماسىنىڭ قىزمەتكەرلەرى ءبىر اعاش كەسىلگەن جەرگە ونداعان جاس كوشەت وتىرعىزادى.
ءبىرىنشى كەزەكتە اپاتتى جانە ەسكى اعاشتار كەسىلەدى. سونىڭ ارقاسىندا اعاشتار مەن بۇتاقتاردىڭ قۇلاۋى ەداۋىر تومەندەدى. ماسەلەن، وتكەن جىلى 200 – دەن استام قۇلاۋ فاكتىسى تىركەلگەن بولسا، 2023 جىلدىڭ باسىنان بەرى – 54 فاكت، ونىڭ ىشىندە 34 اعاش، قالعانى-بۇتاقتار.
الماتى اكىمدىگىنىڭ 2022 جىلعى جۇمىس جوسپارى بويىنشا ماگيسترالدى جولدار بويىندا، ساياباق ايماقتارىندا جانە اۋلا ىشىندەگى اۋماقتاردا 5 مىڭ اپاتتى اعاش كەسىلدى، ونىڭ ورنىنا 50 مىڭ جاس كوشەت وتىرعىزىلدى.
اعىمداعى جىلى ەكولوگيا جانە قورشاعان ورتا باسقارماسى بيىل جوسپارلانعان 16 مىڭ اعاشتىڭ ورنىنا 13 مىڭنان استام اعاشتى كەسىپ تاستادى. كەسىلگەن اعاشتاردىڭ ورنىنا 170 مىڭعا جۋىق كوشەت وتىرعىزۋ جوسپارلانۋدا.
اتاپ وتەرلىگى، اپاتتى اعاشتاردى كەسۋ جۇمىستارىن باستاماس بۇرىن، ج. جيەمبايەۆ اتىنداعى قازاق وسىمدىكتى قورعاۋ جانە كارانتين عىلىمي زەرتتەۋ ينستيتۋتنىڭ عىلىمي قىزمەتكەرلەرىن جانە ەكوبەلسەندىلەردى تارتا وتىرىپ، اپاتتى اعاشتار مۇقيات تەكسەرىلەدى.