الماتىلىق پوليسەيلەر كاليان ساتاتىن بارلاردى تەكسەردى

رەيد بارىسىندا كاليان قولدانۋدىڭ 267 دەرەگى انىقتالىپ، 151 شىلىم شەگەتىن قۇرال تاركىلەندى

بۇل - قالانىڭ ويىن-ساۋىق مەكەمەلەرىندە جۇرگىزىلگەن ءتورت كۇندىك رەيدتىڭ ناتيجەسى، دەپ حابارلايدى Almaty-akshamy.kz.

«ويىن-ساۋىق مەكەمەلەرىندەگى زاڭ بۇزۋشىلىقتاردى اۋىزدىقتاۋ ماقساتىندا جەدەل الدىن الۋ شاراسى جۇرگىزىلدى. ەسكە سالايىق، قوعامدىق ورىنداردا كاليان شەگۋگە تىيىم سالۋدى ەنگىزۋ تۋرالى جارلىق 2013 جىلدىڭ 14 ناۋرىزىندا كۇشىنە ەنگەن بولاتىن. ءبىراق جاستار زاڭدى ەلەمەي، قوعامدىق تاماقتانۋ ورىندارىندا، تۇنگى كلۋبتار مەن بارلاردا جۇپار ءيىستى تۇتىنمەن تىنىستاۋىن توقتاتپايدى. وسى رەيد بارىسىندا 54 ويىن-ساۋىق ورىندارى تەكسەرىلدى. كاليان قولدانعانى ءۇشىن 267 ادام اكىمشىلىك جاۋاپكەرشىلىككە تارتىلىپ، 151 بىرلىك كاليان تاركىلەندى. ق ر اقبتك-نىڭ 441-بابى بويىنشا بۇزۋشىلىقتار انىقتالعان جاعدايدا، كاليان شەگەتىندەرگە 15 اەك كولەمىندە ايىپپۇل سالىنادى. بۇزۋشىلىق قايتالانعان جاعدايدا – 20 اەك. ال مەكەمە يەلەرىنە 20-دان 60 اەك-كە دەيىن ايىپپۇل سالىنادى. ليسەنزياسىز ساتىلعان 138 دانا الكوگولدىك ونىمدەر تاركىلەندى»، – دەدى الماتى قالالىق پد جەرگىلىكتى پوليسيا قىزمەتى باسقارماسىنىڭ باستىعى ەرجان ۇزابايەۆ.

كاليان ءوزىنىڭ ءدامى جانە حوش يىسىمەن قىزىقتىرادى. الايدا، كوپتەگەن جاستار «ءدامدى» ءتۇتىندى جۇتۋ قاراپايىم تەمەكىگە زيانسىز بالاما دەپ سانايدى. ءبىراق كالياننىڭ سۋ سۇزگىسى دە، باسقا قوسىمشا قورعانىس قۇرالدارى دا تەمەكى شەگۋدىڭ قاۋىپسىزدىگىن جانە اۋىر اۋرۋلار مەن تاۋەلدىلىكتەردىڭ پايدا بولماۋىن قامتاماسىز ەتپەيدى.