الماتىدا جەرگىلىكتى قازاق وتباسى امەريكالىق ءانشى، اكتريسا دجەننيفەر لوپەستىڭ باس گيتاريسىن ۇيىنە قوناق ەتىپ، ۇلتتىق تاعامنان ءدام تاتتىردى، - دەپ حابارلايدى اqshamnews.kz.
بوتا ەسىمدى قالا تۇرعىنىنىڭ ايتۋىنشا، وعان ءىنىسى 15 مينۋت بۇرىن تەلەفون شالىپ، ۇيىنە قوناقپەن كەلە جاتقانىن ايتقان. قوناقتىڭ كىم ەكەنىن سۇراعاندا، ول دجەي لونىڭ باس گيتاريسى ەكەنىن جەتكىزگەن.
"جاعداي بىلاي بولدى. دجەي لونىڭ كومانداسى ءبىزدىڭ ءۇيىمىزدىڭ ماڭىنداعى وتەلدە تۇراقتاعان. ال ءىنىم سول ماڭايدا باسكەتبول ويناپ جۇرگەن. دجەي لونىڭ گيتاريسىمەن سول جەردە تانىسىپ، ونى قوناققا شاقىرعان. ول كەلىسكەن. ءىنىم بىزگە قوڭىراۋ شالىپ، داستارحان جايا بەرۋدى ەسكەرتتى. ۇيدە بەسبارماق دايىندالىپ جاتقان ەدى. ول ۇلتتىق تاعامنان ءدام تاتىپ، ۇيدەگى گيتارادا ويناپ بەرىپ، جىلى لەبىزىن ءبىلدىرىپ كەتتى"، - دەپ جازدى بوتا جەلىدەگى پاراقشاسىندا.
بوتا قوناققا داستۇرگە ساي سارقىت تا سالىپ بەرىپ جىبەرگەن. گيتاريستىڭ قاراپايىمدىلىعى كوپتىڭ كوڭىلىنەن شىعىپ، ءتۇرلى پىكىرگە ۇلاستى.
ايتا كەتەيىك، 10 تامىز كۇنى الماتىدا ورتالىق ستاديوندا امەريكالىق جۇلدىز دجەيلونىڭ كونسەرتى ءوتتى. شاراعا 20 مىڭنان استام كورەرمەن جينالدى.