الماتى قالاسى ناۋرىزباي اۋدانى اكىمدىگىندە تۇرعىن ءۇي شارۋاشىلىعىن دامىتۋ ماسەلەلەرى بويىنشا جيىن ءوتتى.
جيىندا كوپپاتەرلى جانە كوپقاباتتى تۇرعىن ۇيلەردى باسقارۋ جۇيەسىندە ەلەۋلى وزگەرىستەر بولاتىنى ايتىلدى.
مەملەكەت باسشىسى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە تۇرعىن ۇي-كوممۋنالدىق شارۋاشىلىق، كاسىپكەرلىك جانە ەكسپورتتىق-كرەديتتىك اگەنتتىكتىڭ قىزمەتى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭعا قول قويدى.
بۇعان دەيىن قولدانىلىپ كەلگەن قاراپايىم سەرىكتەستىك نىسانى جويىلدى. ەندى تەك ەكى باسقارۋ ءتۇرى قالادى: مۇلىك يەلەرى بىرلەستىگى (ميب)، تىكەلەي بىرلەسىپ باسقارۋ (تبب). پاتەر يەلەرى كووپەراتيۆتەرىنىڭ (پيك) مارتەبەسى باسقارۋ سۋبەكتىسى رەتىندە تانىلىپ، باسقارۋشى كومپانيالارمەن تەڭەستىرىلەدى. ولار ميب-پەن شارت نەگىزىندە نەمەسە تۇرعىنداردىڭ جالپى جينالىسى حاتتاماسىنا سايكەس جۇمىس ىستەيدى.
ءاربىر ءۇي ءۇشىن جەكە بانكتىك شوت اشۋ مىندەتتەلەدى.
شوت اشۋ جانە ەسەپ بەرۋ مەرزىمدەرىن بۇزعاندارعا جاۋاپكەرشىلىك كۇشەيتىلەدى. ميب، پيك جانە باسقارۋشى كومپانيالار ءۇيدىڭ ورتاق مۇلكىن باسقارۋ مەن كۇتىپ-ۇستاۋ قىزمەتتەرىن قاتار اتقارا الادى.
جالپى جينالىس وتكىزبەي-اق، ەلەكتروندى داۋىس بەرۋ نەمەسە جازباشا ساۋالناما ارقىلى شەشىم قابىلداۋعا مۇمكىندىك بەرىلەدى.
تۇرعىن ءۇي زاڭناماسىن بۇزعان باسقارۋشى تۇلعالارعا جەكە اكىمشىلىك جاۋاپكەرشىلىك ەنگىزىلەدى.
بۇل وزگەرىستەر تەك تۇرعىن ءۇي زاڭناماسىنا عانا ەمەس، سونىمەن بىرگە جەر، كاسىپكەرلىك، ازاماتتىق ءىس جۇرگىزۋ، الەۋمەتتىك جانە سۋ كودەكستەرىنە، سونداي-اق 23 زاڭعا تۇزەتۋلەر ەنگىزۋدى قامتيدى. جەكەلەگەن تۇزەتۋلەر سالىقتىق اكىمشىلەندىرۋ جانە جاپپاي دەكلاراسيالاۋدان باس تارتۋ ماسەلەلەرىنە قاتىستى.
جاڭا زاڭ كوپپاتەرلى تۇرعىن ۇيلەردى باسقارۋدا تيىمدىلىكتى، اشىقتىقتى جانە جاۋاپكەرشىلىكتى ارتتىرىپ، ازاماتتاردىڭ قۇقىقتارى مەن مۇددەلەرىن قورعاۋعا باعىتتالعان.
الماتى قالاسى كوممۋنالدىق ينفراقۇرىلىم جانە تۇرعىن ءۇي ينسپەكسياسى باسقارماسىنىڭ وكىلى جاندوس مارات ۇلى تۇرعىن ءۇي سالاداعى وزگەرىستەر تۋرالى ايتىپ بەردى.
– جۋىردا تۇرعىن ۇي-كوممۋنالدىق شارۋاشىلىق سالاسىنداعى ءبىرقاتار نورماتيۆتىك اكتىلەرگە وزگەرىستەر مەن تولىقتىرۋلار ەنگىزىلدى. بۇل زاڭ 15 قىركۇيەكتەن باستاپ كۇشىنە ەنەدى. جاڭا ەرەجەلەر تۇرعىنداردىڭ ءوز ۇيلەرىن باسقارۋعا بەلسەندى قاتىسۋىنا مۇمكىندىك بەرەدى. سونىمەن قاتار، پاتەر يەلەرى كووپەراتيۆتەرى (پيك) دە جۇمىسىن جالعاستىرا وتىرىپ، جاڭا فورماتتا قىزمەت اتقارادى، – دەدى ول.