ەڭبەك ادامى
ەرەكشە حوببي
الماتىدا شاعىن عانا قۇمىرسقا فەرماسى بار. وندا ەلدەگى قۇمىرسقالاردان بولەك، تروپيكالىق تۇرلەرى دە كەزدەسەدى، دەپ حابارلايدى Almaty-akshamy.kz Qazaqstan.tv-عا سىلتەمە جاساپ.
«بۇل جەردە ءقازىر مەن قۇمىرسقالاردى زەرتتەپ جاتىرمىن. ولاردا كەنە بار-جوعىن قاراپ جاتىرمىن»، - دەيدى دامير ءابدىعاني.
"كەنە - قۇمىرسقانىڭ باستى جاۋى"، - دەيدى دامير. ول جاندىكتىڭ ۇستىنە جابىسىپ، ىشكى اعازاسىن ۋلايدى ەكەن. وسىنىڭ سالدارىنان ەندى جەتىلىپ كەلە جاتقان قۇمىرسقا كوپ ۇزاماي تىرشىلىگىن توقتاتادى. جاس ميرمەكولوگتىڭ شاعىن فەرماسىندا ءقازىر قۇمىرسقانىڭ وننان استام ءتۇرى بار.
دامير بۇل ىسپەن 13 جاسىنان باستاپ اينالىسا باستاعان. العاشىندا بالاسىنىڭ ەرەكشە قىزىعۋشىلىعىنا اتا-اناسى ۇزىلدى-كەسىلدى قارسى بولعان. ءبىراق ۋاقىت وتە كەلە قولداۋ كورسەتە باستاعان.
«قىزىعۋشىلىعى باسىلىپ قالماس ءۇشىن بالامىزعا قولداۋ كورسەتۋ جاعىن ويلاستىردىق. ۇيدە جاندىكتەردى اسىراۋعا بولمايدى عوي، سول ءۇشىن تىگىن سەحىمىزدىڭ ءبىر بۇرىشىن بالامىزعا جاعداي جاساپ، وزىنە ءبىر قۇمىرسقامەن اينالىساتىن بۇرىش جاساپ بەردىك»، - دەيدى ءداميردىڭ اناسى راۋشان انۋاربەكوۆا.
قۇمىرسقالار ساربازدار، جۇمىسشىلار، بالا كۇتۋشىلەر، ياعني حانشايىم بولىپ ءۇش توپقا بولىنەدى. قۇمىرسقا ءوسىرۋ دامير ءۇشىن جاي عانا حوببي ەمەس، ويتكەنى سوڭعى جىلدارى وسى ءىستىڭ ارقاسىندا جاقسى تابىس تابا باستاعان.
«قۇمىرسقالاردى ءارتۇرلى ەلدەردەن الامىن. قىتايدان، اۆستراليادان، ەۆروپادان، جانە ولاردى كوبەيتىپ، قايتادان ەۋروپاعا، رەسەيگە ساتامىن. سەبەبى ول - جاقسى تابىس كوزى. ءبىر دانا قۇمىرسقانى مىڭ دوللارعا ساتقان كەزدەرىم دە بولدى»، - دەيدى دامير ءابدىعاني.
قۇمىرسقا ساتىپ الاتىن شەتەلدىكتەر ونى كوبىنە دارى-دارىمەك شىعىراتىن زاۋىتتارعا وتكىزەدى. سەبەبى جاندىكتەن بولىنەتىن قىشقىلدىڭ ەمدىك قاسيەتى بار ەكەن. ايتا كەتەتىنى، قۇمىرسقا ءوسىرۋ - وڭاي شارۋا ەمەس. ولارعا قولايلى جاعداي جاساۋ كەرەك. مىسالى، بولمەدەگى ىلعالدىلىق مولشەرى ورتاشا، ال تەمپەراتۋرا +20، 22 گرادۋستان تومەن بولماۋى كەرەك. ودان بولەك كۇن سايىنعى قورەگى بار.
جالپى، الەمدە قۇمىرسقانىڭ 14 مىڭداي ءتۇرى بار. ءداميردىڭ ەسەبىنشە، ولاردىڭ 150-گە جۋىق ءتۇرى قازاقستاندا تىرشىلىك ەتەدى.