الماتى قالاسىنداعى ناۋرىزباي اۋدانىنا قاراستى №208 مەكتەپ-گيمنازياسىندا باستاۋىش سىنىپ وقۋشىلارىنا ارنالعان «مەنىڭ بولاشاعىم» اتتى ەرەكشە شارا ءوتتى. ءىس-شارانى ۇيىمداستىرۋداعى باستى ماقسات — بالالاردىڭ ءارتۇرلى ماماندىقتار تۋرالى تۇسىنىگىن كەڭەيتۋ، بولاشاققا دەگەن قىزىعۋشىلىعىن وياتۋ.
مەكتەپ ديرەكتورى گۇلباعدا ادەنوۆانىڭ ايتۋىنشا، شارا بارىسىندا شامامەن 300 وقۋشى وزدەرىن ءتۇرلى كاسىپ يەسى رەتىندە سەزىنىپ كوردى.
– ءبىزدىڭ وقۋ ورنىمىزدىڭ اۋماعىندا «ماماندىقتار قالاشىعى» فورماتىندا وتكەن ءىس-شاراعا ءارتۇرلى باعىتتاعى ماماندىق يەلەرى قاتىستى. بالالار دارىگەر، ءورت ءسوندىرۋشى، پوليسيا قىزمەتكەرى، ۆيزاجيست، اسپاز، تىگىنشى، شاشتاراز سىندى مامانداردىڭ جۇمىسىن ءوز كوزدەرىمەن كورىپ، تاجىريبە جاساپ كوردى، – دەدى مەكتەپ ديرەكتورى.
شاراعا الماتى قالاسىنداعى ءتورت كوللەدجدىڭ اكىمشىلىگى مەن ستۋدەنتتەرى قوناق رەتىندە كەلىپ، مەكتەپ وقۋشىلارىنا شەبەرلىك ساباقتارىن وتكىزدى.
الماتىلىق قۇرىلىس-تەحنيكالىق كوللەدجىنىڭ ارنايى پاندەر وقىتۋشىسى گۇلسيم كەرىمقۇلوۆانىڭ پىكىرىنشە، باستاۋىش سىنىپ وقۋشىلارى ءۇشىن بۇل كەزەڭ بولاشاق ماماندىققا دەگەن العاشقى قادام بولىپ تابىلادى.
– بۇل جاستاعى بالالاردىڭ قىزىعۋشىلىعى وتە جوعارى. ولار ءتۇرلى كاسىپتى بايقاپ كورىپ، ءوز قيالىنداعى ماماندىقتى ەلەستەتە باستايدى. ۆيزاجيست بولىپ بەت ارلەۋ، اسپاز بولىپ قامىر يلەۋ – مۇنىڭ ءبارى ولاردىڭ شىعارماشىلىق قابىلەتىن دامىتادى. ەڭ باستىسى – ومىرلىك ماماندىقتى تاڭداۋ ەمەس، بىلىمگە قۇشتارلىق پەن وز-وزىنە دەگەن سەنىمدىلىكتى قالىپتاستىرۋ، – دەيدى ۇستاز.
ايتا كەتەيىك، اتالعان شارا قازاقستان رەسپۋبليكاسى وقۋ-اعارتۋ مينيسترلىگىنىڭ بالالاردى قورعاۋ كۇنىنە وراي بەكىتكەن مەدياجوسپارىنا سايكەس وتكىزىلدى.
