الماتىدا تۇڭعىش رەت 1 ماۋسىمدا رەسپۋبليكا سارايىندا «جاس قانات. بالالار – 2023» رەسپۋبليكالىق بالالار شىعارماشىلىق بايقاۋى ءوتتى.
وسى بايقاۋدا “ۆوكال” نوميناسياسى بويىنشا الماتى قالاسى وقۋشىلار سارايىنىڭ تۇلەگى داستان تۇردالى “سامال تاۋ” قازاق حالىق انىمەن گران-پري يەگەرى اتاندى. ەندى ول شىلدە ايىندا «مەدەۋ» مۇز ايدىنىندا وتەتىن «ازيا داۋىسى» حالىقارالىق فەستيۆالىندە قازاقستاننىڭ نامىسىن قورعايدى، دەپ حابارلايدى Almaty-akshamy.kz
جۇلدەلى ورىندار تومەندەگىدەي ءبولىندى:
1-ورىندى تۇركىستان وبلىسىنان زەرە ءجۇنىسباي،
2-ورىندى ماڭعىستاۋلىق ءامينا اسگاتوۆا،
3-ورىندى اقتوبە وبلىسىنان بالىم نسانالى يەلەندى.
جەڭىمپازدارعا التىن، كۇمىس جانە قولا قاناتتاردان بولەك، الداعى «ازيا داۋىسى» حالىقارالىق فەستيۆالىنە دايىندىق جۇمىستارى ءۇشىن الماتى قالاسىنىڭ اكىمى ەربولات دوسايەۆتىڭ اقشالاي گرانتتارى تابىس ەتىلدى.
«گران-پري العان كەزدە قاتتى قۋاندىم جانە تولقىپ كەتتىم. مۋزىكاعا العاشقى قادامدارىمدى 3 جاسىمدا باستاعان ەدىم، ۆوكالعا 5 جاسىمنان باستاپ باردىم. سودان بەرى كوپتەگەن رەسپۋبليكالىق جانە حالىقارالىق بايقاۋلارعا قاتىستىم. وسىنداي جەتىستىكتەرگە جەتۋىمە اتا-انام، وقۋشىلار سارايىنىڭ ۇستازدارى كومەكتەستى. بولاشاقتا العان بەتىمنەن قايتپاي، ءوز كۋميرىم ديماش اعا سياقتى ستاديونداردا، ۇلكەن ساحنالاردا ونەر كورسەتۋدى ارماندايمىن»، - دەيدى داستان تۇردالى.
بايقاۋدى ۇيىمداستىرۋشىلاردىڭ ايتۋىنشا، «جاس قانات. بالالار – 2023» اڭىزعا اينالعان «جاس قانات» بايقاۋىنىڭ تاريحىنداعى جاڭا باعىت بولماق. ەلىمىزدىڭ بارلىق وبلىستارىنان كەلگەن 22 ۇمىتكەردىڭ ونەرىن رەسپۋبليكالىق ەسترادا شەبەرى الىبەك دىنىشيەۆ، «جاس قانات» بايقاۋىنىڭ ءبىرىنشى گران-پري يەگەرى مەدەۋ ارىنبايەۆ، ءجانيا اۋباكىروۆا، بايعالي سەركەبايەۆ جانە باسقا دا بەلگىلى مادەنيەت جانە ونەر قايراتكەرلەرى باعالادى.