قازان ايىندا ەلەكتروندىق ەڭبەك بيرجاسىندا (بۇدان ءارى – ەەب) 131،8 مىڭ بوس جۇمىس ورنى جانە 111،5 مىڭ تۇيىندەمە ورنالاستىرىلدى.
قىركۇيەكپەن سالىستىرعاندا ەڭبەك نارىعىندا سۇرانىستىڭ ءوسۋى بايقالادى (+4% نەمەسە 1،7 مىڭ بوس جۇمىس ورنى)، ال ۇسىنىس 2%-عا تومەندەدى (-2،3 مىڭ تۇيىندەمە).
«قازان ايىندا سۇرانىستىڭ ەڭ كوپ ۇلەسى ءوندىرىس سالاسىنا ءتۇستى – 19،7 مىڭ بوس جۇمىس ورنى، بۇل وتكەن ايعا قاراعاندا 71%-عا (8،2 مىڭ بوس جۇمىس ورنى) ارتىق. وندىرىستىك سالاداعى سۇرانىس ءوسىمىنىڭ ۇشتەن بىرىنەن استامى (35% نەمەسە 2،8 مىڭ بوس جۇمىس ورنى) باتىس قازاقستان وبلىسىنا، ونىڭ ىشىندە قاراشىعاناق كەن ورنىن كەڭەيتۋ جونىندەگى جوبانى ىسكە اسىرۋعا بايلانىستى كەلدى. ناتيجەسىندە ءوڭىر ەەب-داعى بوس جۇمىس ورىندارىنىڭ جالپى سانىن (+67% نەمەسە 3،8 مىڭ بىرلىك) ۇلعايتۋ بويىنشا كوشباسشى بولدى»، – دەپ حابارلادى ەڭبەك رەسۋرستارىن دامىتۋ ورتالىعىنىڭ ستراتەگيا جانە ۇلكەن دەرەكتەردى تالداۋ دەپارتامەنتى ديرەكتورىنىڭ ورىنباسارى ۇلپان شەگەنوۆا.
قازان ايىندا جۇمىس بەرۋشىلەر تاراپىنان بەلسەندىلىك تۇركىستان (+36% نەمەسە 2،8 مىڭ بىرلىك) جانە قىزىلوردا (+30% نەمەسە 1،1 مىڭ بىرلىك) وبلىستارىندا دا بايقالدى.
ەڭبەك نارىعىندا ءبىلىم بەرۋ جانە تاربيە سالاسىنىڭ قىزمەتكەرلەرى ءۇشىن بوس ورىندار سانىنىڭ قىركۇيەكپەن سالىستىرعاندا ايتارلىقتاي تومەندەۋى
(-43% نەمەسە 13،4 مىڭ بىرلىك) بايقالادى. بۇل رەتتە ءبىلىم بەرۋ سەكتورىنداعى بەلسەندىلىكتىڭ تومەندەۋى جۇمىس بەرۋشىلەرگە عانا ەمەس، جۇمىس ىزدەۋشىلەرگە دە اسەر ەتتى. ماسەلەن، ورتا مەكتەپ ءمۇعالىمى لاۋازىمىنا كانديداتتار ورنالاستىرعان تۇيىندەمەلەر سانى قازان ايىندا 30 %-عا نەمەسە 3،3 مىڭ بىرلىككە ازايدى.
قازان ايىندا ەڭ كوپ سۇرانىسقا ورتا بىلىكتى جۇمىسشىلار يە بولدى
(65،2 مىڭ بوس جۇمىس ورنى نەمەسە ەەب-عا جالپى سۇرانىستىڭ 49،2%). جوعارى بىلىكتى ماماندار ءۇشىن 31 مىڭ بىرلىك نەمەسە جالپى بوس جۇمىس ورىندارىنىڭ 24%-ى بولدى. بىلىكتىلىگى جوق جۇمىس كۇشىنە 35،6 مىڭ بوس جۇمىس ورنى نەمەسە جالپى رەسپۋبليكالىق سۇرانىستىڭ 26،8%-ىن قۇرادى.
«ۇسىنىسقا كەلەتىن بولساق، ەەب-عا ەڭ كوپ تۇيىندەمەنى قازان ايىندا ورتا بىلىكتى قىزمەتكەرلەر ورنالاستىردى – 44،2 مىڭ بىرلىك نەمەسە جالپى ۇسىنىستىڭ 40 %-ى. ءوز كەزەگىندە جوعارى بىلىكتى ماماندار 39،2 مىڭ تۇيىندەمە (جالپى ۇسىنىستىڭ 35%) ورنالاستىردى. بىلىكتىلىگى جوق قىزمەتكەرلەردىڭ تۇيىندەمەلەرىنىڭ ۇلەسى جالپى ساننىڭ 25%-ىن نەمەسە 28،1 مىڭ بىرلىكتى قۇرادى»، – دەدى ۇلپان شەگەنوۆا.
وڭىرلەر بولىنىسىندە ورنالاستىرىلعان تۇيىندەمەلەر سانىنىڭ ۇلعايۋى الماتى (+44% نەمەسە 3،5 مىڭ تۇيىندەمە) جانە استانا (+19% نەمەسە 1،4 مىڭ تۇيىندەمە) قالالارىندا، سونداي-اق اتىراۋ وبلىسىندا (+17% نەمەسە 1 مىڭ تۇيىندەمە) تىركەلدى.
ناقتى ماماندىقتار بولىنىسىندە ەەب-دا بايلانىس ورتالىقتارى وپەراتورلارىنىڭ (ولار ءۇشىن بوس ورىندار سانى ىزدەنۋشىلەر سانىنان 4،5 مىڭ بىرلىككە ارتىق)، قازاندىق وپەراتورلارىنىڭ (3،2 مىڭ بىرلىككە)، سونداي-اق وت جاعۋشىلاردىڭ (3 مىڭ بىرلىككە) تاپشىلىعى بايقالدى. سونىمەن قاتار، شەت ءتىلى مۇعالىمدەرىنىڭ پوزيسياسىنا ۇمىتكەرلەر سانى، كەرىسىنشە، ۇقساس بوس جۇمىس ورىندارىنىڭ سانىنان 1،2 مىڭ ادامعا، ۆاحتەرلەر – 1 مىڭ ادامعا، زاڭگەرلەر – تيىسىنشە 0،9 مىڭ ادامعا اسىپ ءتۇستى.
قازان ايىندا جۇمىس بەرۋشىلەر ەڭ جوعارى جالاقى مولشەرىن قۇرىلىس زەرتحاناسىنىڭ ينجەنەرى (ورتا ەسەپپەن 600 مىڭ تەڭگەدەن باستاپ)، ونەركاسىپتىك الپينيستەرگە (583 مىڭ تەڭگەدەن باستاپ)، سونداي-اق باس اگرونومدارعا (580 مىڭ تەڭگەدەن باستاپ) ۇسىندى. ءوز كەزەگىندە، جۇمىس ىزدەۋشىلەر تاراپىنان ەڭ جوعارى جالاقىنى تاۋار بيرجالارىنداعى ترەيدەرلەر (ورتا ەسەپپەن 1،5 ملن تەڭگەدەن باستاپ)، ءبىلىم بەرۋ سالاسىنداعى عىلىمي قىزمەتكەرلەر (1،1 ملن تەڭگەدەن باستاپ)، سونداي-اق كەمە كاپيتاندارى (931 مىڭ تەڭگەدەن باستاپ) سۇرادى.