بيىلعى جىلدىڭ ءبىرىنشى توقسانىندا الماتى تۇرعىندارىنا كورسەتىلگەن مەديسينالىق كومەك ساپاسىن باقىلاۋ بارىسىندا 58 مىڭ قىزمەتتىڭ ءتۇرلى كەمشىلىكتەرمەن كورسەتىلگەنى انىقتالدى6 دەپ حابارلايدى almaty-akshamy.kz
ناتيجەسىندە قالاداعى ەمدەۋ مەكەمەلەرىنە 265 ملن تەڭگە ايىپپۇل سالىندى. بۇل تۋرالى بۇگىن «الەۋمەتتىك مەديسينالىق ساقتاندىرۋ قورى» كەاق الماتى فيليالى ديرەكتورىنىڭ ورىنباسارى جانار كەنجەبايەۆا حابارلادى.
ايتۋىنشا، كەمشىلىكتىڭ باسىم بولىگى باستاپقى مەديسينالىق-سانيتارلىق كومەك كورسەتەتىن ەمحانالاردان انىقتالىپ وتىر. ولار 57 مىڭنان استام قىزمەتتى كەمشىلىكتەرمەن كورسەتكەنى ءۇشىن 150 ملن تەڭگە كولەمىندە ايىپپۇل ارقالادى.
سونىمەن قاتار، اقاۋمەن كورسەتىلگەن 680 قىزمەت – ستاسيونارلار مەن ستاسيوناردى الماستىراتىن كومەك ۇيىمدارىنا تيەسىلى. اتالعان كەمشىلىكتەر ءۇشىن 100 ملن تەڭگە ايىپپۇل سالىنعان.
«مونيتورينگ بارىسىندا انىقتالعان كەمشىلىكتەردىڭ دەنى ەمدەۋ-دياگنوستيكا بارىسىندا بەلگىلەنگەن ستاندارتتاردان اۋىتقۋ، مەديسينالىق قۇجاتتاردى دۇرىس تولتىرماۋ، قىزمەت باعاسىن نەگىزسىز ءوسىرۋ سىندى ولقىلىقتارعا كەلىپ سايادى. سونىمەن قاتار، «كورسەتىلدى» دەپ جازىلعان بەلگىلى ءبىر قىزمەت تۇرلەرىنىڭ شىن مانىندە كورسەتىلگەنىن راستاي الماعان كلينيكالار دا بار»، – دەدى جانار كەنجەبايەۆا.
بۇعان دەيىن حابارلانعانداي، مسق كورسەتىلگەن قىزمەت ساپاسىنا تۇراقتى باقىلاۋ جۇرگىزىپ وتىرادى. بۇگىندە دارىگەر كومەگىنە جۇگىنبەگەن ادامدى «قابىلداۋدا بولدى» دەپ جازۋ ماسەلەسى جۇرتشىلىق اراسىندا وزەكتى ماسەلەگە اينالعانى بەلگىلى. بيىلعى قاڭتار-ناۋرىز ايلارى ارالىعىندا فيليال ماماندارى ازاماتتاردان تۇسكەن ارىز-شاعىمدار ناتيجەسىندە وسىنداي 50 فاكتىنى انىقتاپ، ەمحانا-امبۋلاتوريا دەڭگەيىندە جۇرگىزىلگەن مونيتورينگ بارىسىندا مەديسينا ۇيىمدارىنا 1،5 ملن تەڭگە ايىپپۇل سالدى. قايتارىپ الىنعان قاراجات مەديسينالىق كومەكتىڭ وزگە تۇرلەرىنە جۇمسالادى، دەدى فيليال باسشىسىنىڭ ورىنباسارى.
ەستەرىڭىزگە سالا كەتسەك، وڭتۇستىك استانادا 226 مەديسينا ۇيىمى تەگىن مەديسينالىق كومەك جانە ءمامس پاكەتتەرى شەڭبەرىندە قىزمەت كورسەتەدى.