2023 جىلدىڭ ءبىرىنشى توقسانىندا وڭتۇستىك استانالىقتارعا مىندەتتى الەۋمەتتىك مەديسينالىق ساقتاندىرۋ ەسەبىنەن 52،8 ملرد تەڭگەگە مەديسينالىق كومەك كورسەتىلدى. بۇل تۋرالى بۇگىنگى بريفينگتە مسق الماتى قالالىق فيليالى ديرەكتورىنىڭ ورىنباسارى جانار كەنجەبايەۆا حابارلادى.
ايتۋىنشا، جىل سايىن مەديسينالىق ساقتاندىرۋ ەسەبىنەن كارديوحيرۋرگيا، نەيروحيرۋرگيا، ۋرولوگيا، تراۆماتولوگيا، ونكولوگيا، حيرۋرگيا سىندى تاعى دا باسقا پروفيلدەر بويىنشا جۇزدەگەن وپەراسيا جاسالىپ جاتىر. وسىنداي ءبىر عانا كۇردەلى وتانىڭ قۇنى ورتا ەسەپپەن بىرنەشە ميلليون تەڭگەگە جەتىپ جىعىلادى.
«مىسالى، ءبىرىنشى توقساندا الماتى قالاسىندا 404 كارديوحيرۋرگيالىق وپەراسيا جاسالىپ، وعان 2،1 ملرد تەڭگە تولەنگەن. سونىمەن قاتار، 1 ملرد تەڭگەگە 193 نەيروحيرۋرگيالىق وتا جاسالعان. تاعى 118،1 ملن تەڭگەنى مسق ءلور-پروفيلى بويىنشا جاسالعان 16 وپەراسياعا جۇمسادى»، - دەدى جانار كەنجەبايەۆا.
بۇگىندە ارتروز، ارتريت سىندى بۋىن اۋرۋلارىنىڭ كوبەيۋىنە بايلانىستى تىزە، جامباس بۋىندارىن الماستىرۋشىلار سانى كۇرت ارتىپ وتىر. 2023 جىلى الماتىلىق تراۆماتولوگتار وسىنداي 1100-دەن استام وپەراسيا جاسادى. وعان قور تاراپىنان 1،6 ملرد تەڭگە تولەندى، دەيدى فيليال وكىلى.
سونداي-اق، جالپى قۇنى 256،1 ملن تەڭگەدەن اساتىن 35 اعزا الماستىرۋ وپەراسياسى جاسالعان. سونىڭ ىشىندە 27 بۇيرەك-باۋىر الماستىرۋ وپەراسياسى دا بار.
«ءبىر قاراعاندا، مۇنىڭ ءبارى جاي عانا سيفر بولىپ كورىنۋى مۇمكىن. شىن مانىندە، ساقتاندىرىلعان ازاماتتاردىڭ قالتاسىنان شىعاتىن شىعىن ەداۋىر قىسقارىپ، ولار وسىنشا قىزمەتتى تەگىن پايدالانىپ وتىر»، - دەپ قورىتتى جانار كەنجەبايەۆا.