الماتى قالاسى قوعامدىق دەنساۋلىق ساقتاۋ باسقارماسىنىڭ قالالىق پەريناتالدىق ورتالىعىندا 36 جاستاعى كەلىنشەك ەكى ەگىزدەن كەيىن ۇشەم ومىرگە اكەلدى، دەپ حابارلايدى اqshamnews.kz ءتىلشىسى.
فاتيما، زۋحرا، ايشا دۇنيەگە قالاي كەلدى؟
ءۇش بىردەي قىز بالانىڭ باقىتتى اتا-اناسى ەلميرا رىسمانوۆا مەن ونىڭ جۇبايى نۇرماحان الىبايەۆ. جۇكتىلىك ۇشەم كوتەرگەن كەزدە وتە سيرەك كەزدەسەتىن تابيعي جولمەن، ياعني كومەكشى رەپرودۋكتيۆتى تەحنولوگيالاردىڭ كومەگىنسىز بولعان.
بالالاردىڭ اناسى 31ء-شى اپتاسىندا قالالىق پەريناتالدىق ورتالىققا ءتۇستى. مەرزىمىنەن بۇرىن بوسانۋ قاۋپىنە جانە ۇشتىك جۇكتىلىكتىڭ ەرەكشەلىكتەرىنە بايلانىستى وعان شۇعىل كەسار تىلىگى جاسالدى.
تاجىريبەلى دارىگەرلەردىڭ كۇردەلى، الايدا ءساتتى جاسالعان وپەراسياسىنىڭ ناتيجەسىندە ءۇش قىز دۇنيەگە كەلدى:
• ساعات 14:07-دە – سالماعى 1711 گرامم، بويى 43 سم قىز؛
• ساعات 14:08-دە – سالماعى 1748 گرامم، بويى 40 سم قىز؛
• ساعات 14:09-دا – سالماعى 1493 گرامم، بويى 40 سم قىز.
ولارعا فاتيما، زۋحرا جانە ايشا ەسىمدەرى بەرىلدى.
"سابيلەر بىردەن جاڭا تۋعان نارەستەلەردىڭ رەانيماسيا بولىمىنە ورنالاستىرىلدى. ولارعا بارلىق قاجەتتى كومەك كورسەتىلىپ جاتىر. ومىرلەرىنىڭ العاشقى مينۋتتارىنان باستاپ قىزدار دارىگەرلەردىڭ قامقورلىعى مەن ءجىتى باقىلاۋىندا. پەريناتالدى ورتالىق ماماندارىنىڭ كاسىبيلىگىنىڭ ارقاسىندا نارەستەلەر قۋاتتانىپ، دەنساۋلىقتارى كۇنسايىن نىعايىپ كەلەدى" دەلىنگەن مەكەمە حابارلاماسىندا.
10 بالانىڭ اناسىنان اق تىلەك
ەرەكشە جۇكتىلىكتىڭ بارلىق قيىندىقتارىنا قاراماستان، 36 جاستاعى انا دا ءقازىر ءوزىن جاقسى سەزىنۋدە جانە دارىگەرلەرگە قولداۋ كورسەتكەندەرى ءۇشىن العىس ايتىپ وتىر.
"بۇل مەنىڭ ءۇشىنشى ەگىزدەرىم. ءبىزدىڭ وتباسىمىزدا 2019 جانە 2022 جىلدارى دۇنيەگە كەلگەن 2 جۇپتان ەگىزدەرىمىز ءوسىپ جاتىر. ال ەندى، 2025 جىلى، دۇنيەگە ۇشەم اكەلدىم! اللاعا شۇكىر، ەندى بىزدە 10 بالابار.قالالىق پەريناتالدىق ورتالىقتىڭ اكۋشەر-گينەكولوگتارىنا، دارىگەرلەرىنە جانە بارلىق ماماندارىنا شىن جۇرەكتەن العىس ايتامىن. دارىگەرلەردىڭ كاسىبيلىگىنىڭ جانە قامقورلىعىنىڭ ارقاسىندا ءبارى ءساتتى ءوتتى"،- دەيدى كوپبالالى انا ەلميرا رىسمانوۆا.
قالالىق پەريناتالدىق ورتالىقتىڭ باسشىلىعى مەديسينالىق ۇجىمنىڭ جوعارى كاسىبيلىگىن العا تارتىپ وتىر. سونىڭ ارقاسىندا ۇشەمنىڭ بوسانۋىن ءساتتى وتكىزىپ، ءۇش بالانىڭ ءومىرىن ساقتاپ قالۋ جانە ۇقىپتى تۇردە ەمدەلۋىن قامتاماسىز ەتۋ مۇمكىن بولعان. بۇل بيىلعى پەريناتالدىق ورتالىقتا دۇنيەگە كەلگەن العاشقى ۇشەم.