قازاقستاندا 1 شىلدەدەن باستاپ وتباسىعا قاتىستى جاڭا نىسان پايدا بولادى، دەپ حابارلايدى aqshamnews.kz
قازاقستاندا 1 شىلدەدەن باستاپ ەلىمىزدە وتباسىعا ورنالاسۋدىڭ جاڭا ءتۇرى – "كاسىبي قابىلداۋشى وتباسى" ەنگىزىلەدى.
وقۋ-اعارتۋ مينيسترلىگى بۇل ۋاقىتشا شارا بالالارعا ءقاۋىپسىز ءارى جايلى ءۇي جاعدايىن جاساۋعا باعىتتالعانىن ايتتى.
"قابىلداۋشى كاسىبي وتباسىلار ءبىر ۋاقىتتا ءتورت بالاعا دەيىن قابىلداي الادى. ءاربىر بالاعا جەكە كوڭىل ءبولىنىپ، قامقورلىق كورسەتىلەدى. بالانىڭ مۇنداي وتباسىندا بولۋ مەرزىمى ەڭ كوپ دەگەندە التى ايدى قۇرايدى"،- دەلىنگەن اقپاراتتا.
قابىلداۋشى كاسىبي وتباسىلارعا تەك ءتورت ساناتتاعى بالالار عانا ورنالاستىرىلادى:
جەتىم بالالار؛
اتا-اناسىنىڭ قامقورلىعىنسىز قالعان بالالار؛
پاناسىز جانە قاراۋسىز قالعان بالالار؛
زورلىق-زومبىلىقتان زارداپ شەككەن بالالار.
ۆەدومستۆو اقپاراتىنشا، قابىلداۋشى كاسىبي وتباسى بولۋعا ۇمىتكەرلەر مىندەتتى تۇردە جەتىم بالالارعا ارنالعان ارنايى ۇيىمدار مەن بالالاردى وتباسىنا ورنالاستىرۋعا كومەكتەسەتىن اككرەديتتەلگەن مەكەمەلەردە پسيحولوگيالىق دايىندىقتان وتەدى.
كانديداتتاردى تاعايىنداۋ تۋرالى شەشىمدى قامقورشىلىق ورگاندارى قابىلدايدى. بۇل شەشىم ۇسىنىلعان قۇجاتتاردىڭ تولىقتىعى مەن زاڭ تالاپتارىنا سايكەس قابىلدانادى.
قابىلداۋشى كاسىبي تاربيەشىگە ءار بالا ءۇشىن اي سايىن جاردەماقى جانە كورسەتكەن قىزمەتى ءۇشىن قوسىمشا تولەم قاراستىرىلعان.
ايتا كەتەيىك، ەلىمىزدە بالالاردى ورنالاستىرۋدىڭ ءتورت ءتۇرى بار:
اسىراپ الۋ،
قامقورشىلىق،
پاترونات،
قابىلداۋشى وتباسى.
مينيسترلىك بالالار انىقتالعان بويدا ينتەرنات مەكەمەلەرىنە ەمەس، بىردەن وتباسىلارعا جىبەرىلەتىندىگىن، بۇل ولاردىڭ وتباسى جىلۋىن سەزىنۋىنە مۇمكىندىك بەرەتىندىگىن ايتتى.