ولار بيزنەسكە ارنالعان جەڭىلدىكتەردى الىپ تاستاۋعا قارسى
بۇگىن الماتى قالاسى كاسىپكەرلەر پالاتاسىنىڭ الاڭىندا كاسىپكەرلەر جيىن وتكىزىپ، سالىق كودەكسىنە ديۆيدەندتەردى سالىق سالۋدان بوساتۋ بويىنشا جەڭىلدىكتەردىڭ كۇشىن جوياتىن تۇزەتۋگە قارسىلىقتارىن ءبىلدىردى، دەپ حابارلايدى Almaty-akshamy.kz Baq.kz سىلتەما جاساپ.
«الماتى كاسىپكەرلەرى سالىق كودەكسىنە ديۆيدەندتەردى سالىق سالۋدان بوساتۋ بويىنشا جەڭىلدىكتەردى الىپ تاستايتىن جاڭا تۇزەتۋلەردىڭ ەنگىزىلۋىنە الاڭدايدى. كاسىپكەرلەردىڭ پىكىرىنشە، بۇل نورما بيزنەسكە ەكى ەسە سالىق سالۋىنا الىپ كەلەدى، ينۆەستيسيالاردىڭ تيىمدىلىگى مەن قازاقستاننىڭ ينۆەستورلار ءۇشىن تارتىمدىلىعىن تومەندەتەدى»، – دەپ اتاپ ءوتتى الماتى قالاسى وكپ ديرەكتورى ايتۋار قوشمامبەتوۆ.
ەسكە سالساق، 8 ماۋسىمدا پارلامەنت ءماجىلىسى وتىرىسىندا ەكىنشى وقىلىمدا، شۇعىل زاڭ جوباسى اياسىندا سالىق كودەكسىنە تۇزەتۋلەر قابىلداندى. بۇل تۇزەتۋلەر شاعىن جانە ورتا بيزنەس سۋبەكتىلەرى ءۇشىن ديۆيدەندتەردى سالىق سالۋدان بوساتۋ تۇرىندەگى جەڭىلدىكتەردى الىپ تاستاۋدى كوزدەيدى. وسىلايشا، 2023 جىلدان باستاپ رەزيدەنت ەمەستەر مەن جەكە تۇلعالارعا تولەنەتىن ديۆيدەندتەر (ەگەر ديۆيدەندتەر سوماسى 30 000 اەك-تەن اساتىن بولسا) بويىنشا جەڭىلدىكتەر الىنىپ تاستالادى.
ۇلتتىق پالاتا ماماندارى سالىق كودەكسىنە ەنگىزىلگەن تۇزەتۋلەرگە قاتىستى پىكىر ءبىلدىرىپ، تۇزەتۋلەر قابىلدانۋى وتاندىق شاعىن جانە ورتا بيزنەسكە تەرىس اسەر ەتۋى مۇمكىن ەكەنىن جانە ەنگىزۋگە نەعۇرلىم جۇيەلى قاراۋ قاجەتتىگىن اتاپ ءوتتى.
«ديۆيدەندتەرگە سالىناتىن سالىق ءقازىر مىناداي تارتىپتە تولەنەدى – ەگەر كاسىپكەر كومپانيانى 3 جىلدان از ۋاقىت يەلەنسە، وندا ديۆيدەندتەر العان كەزدە ول 5% تولەيدى. ەگەر كومپانياسىنا 3 جىلدان استام ۋاقىت بولسا، ديۆيدەندتەرگە سالىق سالىنبايدى. ءقازىر ديۆيدەندتەرگە 10% مولشەرلەمە بەلگىلەۋ ۇسىنىلدى. ەگەر ءبىز جاڭا قازاقستاننىڭ قارقىندى دامۋىن قالاساق، وندا قوسىمشا سالىقتار ەنگىزەتىن تۇزەتۋلەردىڭ كۇشىن جويىپ، تۇسىنىكتى سالىق كودەكسىن جاساپ، كودەكسكە كەم دەگەندە 3 جىلعا وزگەرىستەر ەنگىزۋدى توقتاتۋ قاجەت»، – دەپ اتاپ ءوتتى الماتى قالاسى وكپ وڭىرلىك كەڭەسىنىڭ ءتوراعاسى ماكسيم بارىشيەۆ.