اتالعان كاسىپتى «ماعان دا ۇيرەتشى» دەپ نيەت تانىتىپ جاتقاندار كوپ ەكەن
الماتى وبلىسىنىڭ تۇرعىنى جانىبەك سەيىتوۆ پلاستيكالىق بوتەلكەلەردەن تۇرمىسقا قاجەتتى زاتتار جاساپ شىعارادى. ول بۇل كاسىپ ءتۇرىن ينتەرنەتتەن ءوز بەتىمەن ۇيرەنگەن. بۇگىندە كاسىپكەردىڭ تۇراقتى تۇتىنۋشىلارى دا بار، دەپ حابارلايدى Almaty-akshamy.kz. قازاقپاراتقا سىلتەمە جاساپ.
جانىبەك سەيىتوۆ الماتى وبلىسى قاراتال اۋدانى ۇشتوبە قالاسىنىڭ تۇرعىنى. بۇعان دەيىن تاكسيست بولعان، بيىلدان باستاپ جاڭا كاسىپتى مەڭگەردى.
«بۇل ءىستى وسى جىلى قىستا قولعا الدىم. بۇعان دەيىن پلاستيكالىق بوتەلكەلەردەن ءتۇرلى زاتتاردى جاساۋدى ينتەرنەتتەن كورىپ، سودان قىزىعۋشىلىق تۋىندادى. باسىندا ءبىر زات جاساپ كوردىم، كەيىن اقىرىنداپ كوبەيتە باستادىم. پلاستيكالىق بوتەلكەلەردەن جاسالعان زاتتاردى كورگەن تانىستارىم، كورشىلەرىم مەنى قولداي باستادى. سوسىن اقىرىنداپ جاساعان دۇنيەلەرىمدى Instagram، Tik-Tok، YouToube جەلىلەرىنە جاريا ەتتىم. ول جەردە دە قىزىعۋشىلىق تانىتىپ، جىلى پىكىر قالدىرعاندار كوپ بولدى»، - دەدى جانىبەك سەيىتوۆ.
ونەرتاپقىش ازىرگە پلاستيكالىق بوتەلكەلەردەن سىپىرعى مەن ءجىپ جاسايدى. دەسە دە الداعى ۋاقىتتا باسقا دا زاتتار جاساۋ ويى بار.
«ءجىپ جاساۋ وڭايىراق، تەز بولادى. ال سىپىرعى دايىنداۋ ۋاقىت الادى. جالپى كۇنىنە 4-5 سىپىرعىعا دەيىن دايىنداي الامىن. ونىڭ ۇستىنە جىپكە قاراعاندا سىپىرعىعا سۇرانىس باسىم بولىپ تۇر. ءبىر سىپىرعىنى 2 مىڭ تەڭگەگە ساتىپ جاتىرمىن، ال ءجىپ 200 تەڭگە تۇرادى. كەيبىر تۇتىنۋشىلار 2 مىڭ تەڭگەنىڭ سىپىرعىسىن قىمباتسىنىپ جاتادى. بۇل جەردە ماسەلە پايدانىڭ استىندا قالۋ ەمەس، پلاستيكالىق بوتەلكەدەن سىپىرعى جاساۋ تەحنولوگياسى قيىنداۋ جانە ول ەڭبەك پەن ۋاقىتتى تالاپ ەتەدى. تيىسىنشە باعا دا جوعارىلاۋ. پلاستيكالىق بوتەلكەلەردى ءوزىم ىزدەپ تابامىن. كوپقاباتتى ۇيلەردىڭ قوقىس كونتەينەرلەرىنىڭ جانىندا پلاستيكالىق بوتەلكەلەرگە ارنالعان بولەك جاشىك بار، سول جەردەن جيناپ الامىن»، - دەيدى ول.
ءۇشقالا تۇرعىنىنىڭ شاعىن كاسىپكەرلىكتى قولعا العانىن ەستىگەن جەرگىلىكتى اكىمدىك پەن «اتامەكەن» ۇلتتىق كاسىپكەرلەر پالاتاسىنىڭ وكىلدەرى كاسىپكەرگە بيزنەستىڭ قىر-سىرىن ۇيرەنە ءتۇسۋ ءۇشىن بىلىكتىلىگىن ارتتىرۋ كۋرسىنان ءوتۋدى ۇسىنىپتى.
«كەلەسى جىلدىڭ باسىندا ىسكەرلىكتى وقىپ الۋدى ۇسىندى. نەگىزى بۇعان دەيىن «بيزنەس باستاۋ» باعدارلاماسى بويىنشا وقىعام، ءبىراق ەمتيحاننان وتە الماي قالدىم. ەندى سونى قايتادان مەڭگەرۋ مۇمكىندىگى تۋىپ تۇر. ەگەر وقۋ ساتىمەن بولسا 500 مىڭ تەڭگەنىڭ بيزنەس گرانتىن ۇتىپ الۋعا دا بولادى. پلاستيكالىق بوتەلكەلەردەن زاتتار جاساۋعا قاتىستى يدەيا تولىپ جاتىر، ءبىراق ءبارى اينالىپ كەلىپ قارجىعا تىرەلەدى. سەبەبى ول ءۇشىن زاماناۋي قۇرىلعى كەرەك، ءقازىر نەشەتۇرلى ستانوكتار بار»، - دەدى جاس كاسىپكەر.
ونىڭ ايتۋىنشا، اتالعان كاسىپتى «ماعان دا ۇيرەتشى» دەپ نيەت تانىتىپ جاتقاندار بار ەكەن.
«بولاشاقتا ارمانىم، وسى پلاستيكالىق بوتەلكەلەردەن زاتتار جاساۋ كاسىبىمدى ۇلعايتىپ، ءىرى كاسىپورىن اشقىم كەلەدى. ءقازىر نە كوپ، پلاستيكالىق قالدىق كوپ، شيكىزات جاعىنان پروبلەما جوق. سول سياقتى الداعى ۋاقىتتا سىپىرعى مەن جىپتەن باسقا دا زاتتار جاساپ شىعارۋدى جوسپارلاپ وتىرمىن»، - دەيدى ونەرتاپقىش.