الماتى قالاسىنىڭ ەڭبەك ينسپەكتورلارى 45،3 ملن تەڭگە سوماسىنا 321 زاڭدى تۇلعانى جاۋاپكەرشىلىككە تارتتى.
بۇل تۋرالى وڭىرلىك كوممۋنيكاسيالار قىزمەتىنىڭ بريفينگىندە الماتى قالاسى ەڭبەك ينسپەكسياسىنىڭ باسشىسى ەركىنبەك امىرعالييەۆ مالىمدەدى، دەپ حابارلايدى Almaty-akshamy.kz.
«جىل باسىنان بەرى ازاماتتاردىڭ ەڭبەك قۇقىقتارىن قورعاۋ ماقساتىندا جوسپاردان تىس 522 تەكسەرۋ جۇرگىزىلدى. وسى تەكسەرۋلەر بارىسىندا ەڭبەك زاڭناماسى نورمالارىنىڭ 783 بۇزۋشىلىعى انىقتالىپ، زاڭ بۇزۋشىلىقتاردى جويۋ تۋرالى 387 ۇيعارىم بەرىلدى. جەكە جانە زاڭدى تۇلعالاردىڭ 3 903 ءوتىنىشى قارالدى، بۇل ازاماتتار مەن ۇيىمداردىڭ ەڭبەك قۇقىقتارىن قورعاۋ ماسەلەلەرى بويىنشا بەلسەندىلىگىنىڭ جوعارى ەكەندىگىن كورسەتەدى»، - دەدى ە.امىرعالييەۆ.
سپيكەردىڭ مالىمەتىنشە، 285-تەن استام كاسىپورىندا 708،7 ملن تەڭگەگە جالاقى بويىنشا بەرەشەك وتەلدى، بۇل 1 231 قىزمەتكەردىڭ ەڭبەك قۇقىعىن قورعاۋعا مۇمكىندىك بەردى. الايدا، ەكى كاسىپورىندا 182 قىزمەتكەر الدىندا 97،5 ميلليون تەڭگە سوماسىندا اعىمداعى بەرەشەك قالىپ وتىر.
«قالا كاسىپورىندارىندا جاسالعان 27 698 ۇجىمدىق شارتتىڭ مونيتورينگى مەن تىركەلۋى جۇزەگە اسىرىلدى. جىل باسىنان باستاپ 155 ۇجىمدىق شارت جاسالدى»، - دەپ تولىقتىردى ول.
كاسىپورىنداردا ءتۇسىندىرۋ جۇمىستارى بارىسىندا ەڭبەك ينسپەكتورلارىمەن 2 064 ادامنىڭ قاتىسۋىمەن 132 كەزدەسۋ وتكىزىلدى. سونىمەن قاتار، 673 ازاماتقا ەڭبەك قۇقىقتارىنا قاتىستى ماسەلەلەر بويىنشا تۇسىنىكتەمەلەر بەرىلدى.
سونىمەن قاتار، وندىرىسكە بايلانىستى 59 جازاتايىم وقيعا تىركەلدى. وسى جاعدايلاردىڭ سالدارىنان 4 ادام قايتىس بولدى، 26 ادام اۋىر جاراقات الدى، ال 30 ادام جەڭىل جاراقاتتاندى.
مەملەكەتتىك ورگاننىڭ مالىمەتىنشە، الماتىدا بارلىعى 110 مىڭنان استام كاسىپورىن جۇمىس ىستەيدى، وندا 900 مىڭعا جۋىق جالدامالى جۇمىسشى جۇمىس ىستەيدى.
«كاسىپورىندار مەن قىزمەتكەرلەر سانى كوپ بولعان جاعدايدا ەڭبەك قۇقىقتارىن بۇزۋدى الىپ تاستاۋ مۇمكىن ەمەس، ءبىراق قۇقىقتىق ءتۇسىندىرۋ جۇمىستارى ەسەبىنەن ولاردىڭ سانىن ازايتۋ جوسپارلانۋدا. سونىمەن قاتار، الماتى قالاسى ازاماتتاردىڭ ەڭبەك قۇقىقتارىن قورعاۋ بويىنشا بەلسەندى جۇمىس ىستەپ جاتقانىن اتاپ وتۋگە بولادى»، - دەپ اتاپ ءوتتى سپيكەر.