مۇنى مەملەكەت باسشىسى قاسىم-جومارت توقايەۆ وسى باس اسسامبلەيانىڭ سەسسياسىندا ايتتى.
بۇعان دەيىن بىرنەشە ەلدە قۇران ورتەنگەن ەدى. قازاقستان پرەزيدەنتى الەم مىنبەرىنەن مۇندايعا ەندى جول بەرمەۋ كەرەك ەكەنىن ايتت، دەپ حابارلايدى Almaty-akshamy.kz 24.kz-كە سىلتەمە جاساپ.
«ءبىز باس حاتشى ۇسىنعان "بەيبىتشىلىكتىڭ جاڭا كۇن ءتارتىبىن" قولدايمىز. بۇل ستراتەگيالىق قۇجات الەمدە بەلەڭ العان سەنىمسىزدىك پەن وشپەندىلىككە قارسى تۇرۋى كەرەك. قازاقستان كەلەسى جىلى وتەتىن بولاشاق سامميتىندە بولاشاق پاكتىسىن قابىلداۋ ىسىندە سىندارلى جانە قولداۋشى ءرولىن اتقارادى. ءبىراق قارۋ-جاراققا تىيىم سالۋمەن نەمەسە دەكلاراسياعا قول قويۋمەن عانا بەيبىتشىلىك ورنامايدى. بەيبىتشىلىك مادەنيەتىن قالىپتاستىرۋدا ءدىنارالىق جانە كونفەسسياارالىق ديالوگ ماڭىزدى ءرول اتقارادى.
جۋىردا قاسيەتتى كىتاپتارعا قۇرمەتسىزدىك تانىتۋ اكتىلەرى بولدى. ءبىز وسى جاعدايعا الاڭداۋشىلىق بىلدىرەمىز. يسلامعا جانە باسقا دا دىندەرگە قاتىستى جاسالعان مۇنداي تاعىلىق ارەكەتتەردەن ەركىندىكتىڭ، ءسوز بوستاندىعىنىڭ جانە دەموكراتيانىڭ نىشانى بىلىنبەيدى. قۇران سەكىلدى قاسيەتتى كىتاپتاردىڭ ءبارى ۆانداليزمنەن قۇقىقتىق تۇرعىدا قورعالۋعا ءتيىس»، - دەدى ق ر پرەزيدەنتى قاسىم-جومارت توقايەۆ.