الماتىلىق جاس ونەرتاپقىشتار سپيرتپەن جۇرەتىن كولىك قۇراستىرىپ شىقتى

بۇل كولىكتىڭ ارنايى پيلوتى بار. 

الماتىلىق جاس ونەرتاپقىشتار سپيرتپەن جۇرەتىن كولىك قۇراستىرىپ شىقتى، دەپ حابارلايدى Almaty-akshamy.kz Almaty.tv.

جوعارى وقۋ ورنىنىڭ ستۋدەنتتەرى وزگە دە تۋىندىسىن تانىستىرىپ، جۇرتتى ءتانتى ەتتى. جاس عالىمداردىڭ ايتۋىنشا، جاڭا قۇرىلعىلار وتاندىق تەحنولوگيا سالاسىنىڭ دامۋىنا سەرپىلىس بەرمەك.

«سالماعى 47-49 كەلى اراسىندا بولادى. بۇل كولىكتىڭ ارنايى پيلوتى بار، پيلوتتىڭ سالماعى 55 كەلى بولسا، جالپى 100 كەلى سالماقپەن 25-27 شاقىرىمعا دەيىن جۇرەدى»، – دەدى ق.ساتبايەۆ اتىنداعى قازۇتزۋ ستۋدەنتى الىبەك ىبىرايىم.

جاس ونەرتاپقىشتار ادامنىڭ 7 بۇيرىعىن ەكى ەتپەيتىن روبوتتىڭ قولىن دا تانىستىردى. ستۋدەنتتەردىڭ ايتۋىنشا، بۇل تۋىندى 1 اي قۇراستىرىلىپ، جوبا رەسپۋبليكالىق جارىستا جۇلدەلى بولعان. ودان بولەك، عىلىم سالاسىنا بەت بۇرعان جاستار پايدالى قازبالار تابۋدىڭ وڭتايلى جولىن ۇسىندى.

«80 گرادۋس بۇرىشپەن بۇرعىلايتىن بولساق، اپاتتى جاعدايعا كوپ ۇشىرايدى. ياعني، جارعان كەزدە كەننىڭ بوس جىنىستارىنىڭ شاشىراۋى كوپ بولادى. ءبىز سول سەبەپتى 80 ەمەس، 65 گرادۋسپەن بۇرعىلايمىز دەپ شەشىپ، ەسەبىمىزدى سولاي شىعاردىق»، – دەدى  ق.ساتبايەۆ اتىنداعى قازۇتزۋ ستۋدەنتى المات ساپاربايەۆ.