الماتىلىق دارىگەرلەر كوزىنە مەتالل سىنىعى كىرگەن جاس جىگىتتىڭ كورۋ قابىلەتىن ساقتاپ قالدى. ورتالىق قالالىق كلينيكالىق اۋرۋحانا ماماندارى قابىلداۋ بولىمىنە كوز الماسىنىڭ جاراقاتىمەن تۇسكەن ادام ءومىرىن قۇتقاردى.
ناۋقاستىڭ ايتۋى بويىنشا، جاراقاتتى ءۇي جاعدايىندا العان، جيھازعا ارنالعان قۇرىلعىنىڭ مەتالل سكوباسى كوزىنە كىرىپ كەتكەن.
وفتولمولوگيا بولىمشەسىنىڭ مەڭگەرۋشىسى گۇلزات ابدرايموۆانىڭ ايتۋىنشا، بۇنداي جاتاقات كوز الماسىنىڭ جىرتىلۋىنا، كوز لينزاسىنىڭ ىعىسۋىنا، كاتاراكتا، گلاۋكوما، كوزدىڭ شىنى تارىزدەس قاباتىنا قان جينالۋى نەمەسە توردىڭ زاقىمدالۋىنا (قان قۇيىلۋ، ءىسىنۋ، اجىراۋ) اكەلۋى مۇمكىن.
قاجەتتى بولعان بارلىق تەكسەرىستەن كەيىن دارىگەرلەر كوز ىشىنە تۇسكەن زاتتى شىعارىپ الىپ جاراقات ورنىن تىگۋ وتاسىن اسقان شەبەرلىكپەن جاساپ شىقتى.
«وتا ءساتتى ءوتتى، وتادان كەيىن ناۋقاستىڭ كوزىنىڭ كورۋ قابىلەتى تولىقتاي ساقتالدى. كوزگە كىرگەن ارتىق زاتتى الىپ تاستاعان سوڭ، ءبىز ناۋقاس كوزىنىڭ تورلى قاباتىنا لازەرلىك كواگۋلياسيا جاسادىق، سەبەبى اتالعان وتادان كەيىن ناۋقاستا كوزدىڭ كورۋ قابىلەتى تومەندەپ كەتۋ ءقاۋپى بولدى»،- دەيدى دارىگەر.
كوزدىڭ تورلى قاباتىنا جاسالاتىن لازەرلىك كواگۋلياسيا - تورلى قاباتتىڭ زاقىمدانعان تۇسىن نۇكتەلىك ءادىس ارقىلى لازەرمەن نىعايتۋ. لازەر ءتىندى قىزدىرادى، اسەر ەتۋ ورنىنداعى اقۋىز ىدىرايدى، كواگۋليانتتار («جەلىم نۇكتەلەرى») پايدا بولادى جانە وسىلايشا مەمبرانالار بىر-بىرىنە جابىستىرىلادى.
وسىلايشا كوزدىڭ تورلى قابىعى نىعايتىلادى، زاقىمدانعان جەردىڭ قان اينالىمى مەن نارلەنۋى جاقسارادى، ءتىن اراسىنا سۇيىقتىق ءوتۋىنىڭ الدى الىنادى.
ورتالىق قالالىق كلينيكالىق اۋرۋحانادا مۇنداي وتانى جاساۋ ءۇشىن زاماناۋي قۇرىلعىلار بار، ولار ءتۇرلى دارەجەدەگى كوز اۋرۋىن ەمدەۋدە وزىق ناتيجەلەرگە جەتۋگە مۇمكىندىك بەرەدى.
«كوپ جاعدايدا الىپ تاستاۋدى قاجەت ەتەتىن زاتتار كوزگە اۋىل شارۋاشىلىعى، قۇرىلىس جۇمىستارى، سلەسارلىق جانە اعاش زاتتارمەن جۇمىس ىستەۋ كەزىندە كىرەدى. سول سەبەپتەن دە مەن جۇمىس ىستەۋ بارىسىندا قاۋىپسىزدىك ەرەجەلەرىن ساقتاپ، قورعانىش كوزىلدىرىگىن كيۋدى ۇسىنامىن»، - دەپ قورىتىندىلادى دارىگەر.