تۇشكىرىك – ادام الدىن الا بولجاي المايتىن، شارتتى رەفلەكس ارقىلى بولاتىن، ادامعا جاراتىلىسىنان بەرىلگەن قاسيەت.
تۇشكىرۋ دەنساۋلىققا وتە پايدالى ادەتتەردىڭ ءبىرى. عالىمدار ونىڭ ادام اعزاسىنىڭ دۇرىس جۇمىس جاساۋىنا كومەك ءۇشىن تابيعاتتان بەرىلگەن شارتتى رەفلەكس ەكەنىن دالەلدەگەن.
مەديسينا عىلىمدارىنىڭ ايتۋىنشا، مۇرىن قۋىستارىنا كوپتەگەن ميكروبتار مەن شاڭ جينالىپ قالسا، عىلىمي تىلدە ايتقاندا، «مۇرىن قۋىسى ارقىلى سپازمالىق تۇردە تىنىس الۋ» بولادى. باسقاشا ايتقاندا، قاتتى ءارى تەز شىققان تۇشكىرىك مۇرىنداعى بوگدە زاتتار مەن ارتىق شاڭداردى اۋاعا يتەرىپ شىعارادى.
ءبىراق كەي ادام كوپشىلىك ورتادا، مىسالى جۇمىس كەڭسەسىندە، ساباقتا نەمەسە ماڭىزدى جيىندار مەن جينالىستاردا ويلاماعان جەردەن تۇشكىرگىسى كەلىپ كەتەدى. سونداي ساتتەردە وزگەلەرگە كەدەرگى بولماسىن دەگەن ويمەن تۇشكىرگەنىن بىلدىرمەۋ ءۇشىن مۇرنىن ۇستىنەن باسىپ، كەدەرگى جاساپ، ونى توقتاتۋعا تىرىسادى. رەسەيلىك ماماندار بۇلاي جاساۋ ءقاۋىپتى ەكەنىن العا تارتىپ وتىر. سەبەبى، ولاي جاساۋدىڭ سالدارى ءقاۋىپتى بولۋى مۇمكىن ەكەنىن روسپوترەبنادزور ەسكەرتەدى. بۇل تۋرالى ريا نوۆوستي «سانپروسۆەت» دەپارتامەنتىنىڭ ۇسىنىستارىنا سىلتەمە جاساي وتىرىپ جازادى.
تۇشكىرگەن كەزدە تىنىس الۋدى تەجەيتىن ادامدارعا قۇلاق قالقانىنىڭ زاقىمدانۋى، كوزدىڭ تامىرلارىنىڭ جىرتىلۋى، مۇرىننان قان كەتۋ، سينۋستىڭ زاقىمدانۋى، باس اۋرۋى ءقاۋپى بار ەكەندىگى ەسكەرتىلدى.
تىنىس الۋ جولدارىنداعى جوعارى قىسىم مي انيەۆريزماسىنىڭ جارىلۋىنا اكەلۋى مۇمكىن، بۇل ومىرگە ءقاۋىپ توندىرەدى، دەپ ءتۇسىندىردى ماماندار.
دۇرىس تۇشكىرۋ ءۇشىن مامانداردىڭ ايتۋىنشا، مۇرىن مەن اۋىزدى جابۋ ءۇشىن ماتادان جاسالعان ورامال نەمەسە ءبىر رەتتىك قاعاز مايلىقتار قاجەت، سودان كەيىن قولدى سابىنمەن جۋۋ كەرەك.
«نەگىزى ادام كۇنىنە ءبىر تەت تۇشكىرۋى كەرەك، ال ەگەر ءسىز كۇنى بويى تۇشكىرىپ مازاسىزدانا باستاساڭىز، وندا ءسىزدىڭ تىنىس جولدارىڭىزدا بىردەڭە دۇرىس ەمەس. قاس جۇلىپ وتىرىپ تۇشكىرەتىندەر دە بار ەكەن. سوعان قاراپ تۇشكىرۋگە اسەر ەتەتىن نەرۆ تالشىقتارىنىڭ قاستا ورنالاسقىنىن انىقتادىق»، - دەيدى دارىگەرلەر.