پرەزيدەنتتىڭ كومەكشىسى – قاۋىپسىزدىك كەڭەسىنىڭ حاتشىسى اسەت يسەكەشيەۆتىڭ توراعالىعىمەن مەملەكەت باسشىسىنىڭ تاپسىرمالارىن ىسكە اسىرۋ – قىلمىستىق پروسەستىڭ ءۇش بۋىندى مودەلىنە كوشۋ جانە پوليسيانىڭ سەرۆيستىك مودەلىن ەنگىزۋ جونىندەگى جۇمىس كەڭەسى ءوتتى.
اسەت يسەكەشيەۆ الماتىدا قۇقىق قورعاۋ جۇيەسىن رەفورمالاۋ ماسەلەلەرى بويىنشا كەڭەس وتكىزدى، دەپ حابارلايدى Almaty-akshamy.kz Polisia.kz سايتىنا سىلتەمە جاساپ.
كەڭەس بارىسىندا قاۋىپسىزدىك كەڭەسىنىڭ حاتشىسى مەملەكەت باسشىسىنىڭ قازاقستان حالقىنا جولداۋىندا قويىلعان قۇقىق قورعاۋ سالاسىنداعى مىندەتتەردىڭ ىسكە اسىرىلۋ بارىسىمەن تانىستى. ول قىلمىستىق پروسەستى جاڭعىرتۋ جونىندەگى پيلوتتىق جوبانىڭ بۇكىل ەلگە ماسشتابتالعانىن اتاپ ءوتتى. بۇل سونداي-اق قىلمىستىق ءىس جۇرگىزۋ زاڭناماسىنا ءتيىستى تۇزەتۋلەرمەن بەكىتىلگەن. وسى ورايدا بۇل جۇمىستىڭ جەرگىلىكتى جەرلەردە قانشالىقتى دۇرىس ۇيىمداستىرىلعانىن ءتۇسىنۋ ماڭىزدى. الماتىدا قىلمىستىق پروسەستىڭ ءۇش بۋىندى مودەلىن ەنگىزۋ قالاي ءوتىپ جاتقانى تۋرالى قالا پروكۋرورىنىڭ مىندەتىن اتقارۋشى نازارباي يبرايمولدايەۆ ايتىپ بەردى.
– 2021 جىلى الماتى پوليسياسى قىلمىستىق ىستەر بويىنشا 30 225 پروسەسسۋالدىق شەشىم قابىلدادى، ونىڭ 24 708ء-ى پروكۋرورمەن كەلىسىلىپ، بەكىتىلدى. ياعني، “پروكۋرورلىق سۇزگى” ازاماتتاردىڭ قۇقىقتارىن بۇزۋ سانىن 38%-عا ازايتۋعا مۇمكىندىك بەردى، – دەدى يبرايمولدايەۆ.
كەڭەس اياسىندا اسەت يسەكەشيەۆكە قىلمىستىق ىستەردى جۇرگىزۋدىڭ جاڭا فورماتى، قىزمەتكەرلەردىڭ جۇمىس ورىندارىن جابدىقتاۋ جانە وڭدەلەتىن دەرەكتەردىڭ قاۋىپسىزدىگىن قامتاماسىز ەتۋ ادىستەرى كورسەتىلدى.
– ءقازىر الماتى پوليسيا دەپارتامەنتىندە قىلمىستىق ىستەردى ەلەكتروندى فورماتتا جۇرگىزۋ ءۇشىن 375 جۇمىس ورنى جابدىقتالعان. ە-فورماتتى قولدانۋ پوليسەيلەردىڭ جۇمىسىن اشىق ەتەدى، ال دەرەكتەردى قورعاۋ بويىنشا پايدالانىلاتىن تەحنولوگيالار قىلمىستىق ىستە قۇجاتتاردىڭ بۇرمالانۋىنا جانە اۋىستىرىلۋىنا جول بەرمەيدى، – دەدى الماتى پد باستىعى قانات تايمەردەنوۆ.
ەلەكتروندىق فورمات قابىلداناتىن شەشىمدەردى كەلىسۋ پروسەسىن جەڭىلدەتۋگە جانە جىلدامداتۋعا، سىبايلاس جەمقورلىق تاۋەكەلدەرىن تومەندەتۋگە جانە تەرگەۋ ساپاسىن جاقسارتۋعا مۇمكىندىك بەردى.
سونداي-اق قاۋىپسىزدىك كەڭەسىنىڭ حاتشىسى الماتىنىڭ جول قاۋىپسىزدىگىن باقىلاۋ جۇيەسىنىڭ جۇمىسىمەن تانىستى. جۇيە الماتى پد جەدەل باسقارۋ ورتالىعىنا شوعىرلاندىرىلعان 2 مىڭنان استام بەينەكامەرادان تۇرادى. ەكىنشى ماسەلەنى تالقىلاۋعا كوشكەن اسەت يسەكەشيەۆ پوليسيانىڭ سەرۆيستىك مودەلىن پيلوتتىق رەجيمدە ەنگىزۋ پروسەسى ەلىمىزدىڭ ءۇش وڭىرىندە جۇزەگە اسىرىلىپ جاتقانىن ايتتى. ونىڭ ايتۋىنشا، الماتى ەلىمىزدىڭ ەڭ ءىرى قالاسى بولىپ تابىلادى جانە مۇندا پيلوتتى ىسكە اسىرۋعا جاۋاپكەرشىلىكپەن قاراۋ ماڭىزدى.
– قۇقىق بۇزۋشىلىقتىڭ الدىن الۋدىڭ قازىرگى زامانعى جۇيەسىن قۇرۋ تاسىلدەرى مەن پوليسيانىڭ سەرۆيستىك مودەلىن ەل پرەزيدەنتى جانىنداعى قۇقىق قورعاۋ جانە سوت جۇيەلەرىن رەفورمالاۋ جونىندەگى كوميسسيا ماقۇلدادى. سوندىقتان سىزدەر پوليسيانىڭ سەرۆيستىك ۇلگىسى جۇمىسىنىڭ نەگىزگى قاعيداتتارىن، ونداعى اكىمدىكتىڭ، باسقا دا مەملەكەتتىك ورگاندار مەن جۇرتشىلىقتىڭ ءرولىن تۇسىنۋلەرىڭىز قاجەت. سىزدەر پيلوتتىق اۋماقتىڭ كەيىن مەملەكەت پەن قوعامنىڭ ارىپتەستىگىنە نەگىزدەلگەن قالانىڭ قاۋىپسىزدىك جۇيەسىنىڭ ۆيزيتتىك كارتوچكاسى بولىپ تابىلاتىن الماتى قالاسىنىڭ بۇكىل اۋماعىندا جيناقتالعان تاجىريبەنى تيراجداۋ ءۇشىن بازالىق اۋدان بولاتىنىن تۇسىنۋلەرىڭىز قاجەت. بۇل رەتتە، ءقازىردىڭ وزىندە ەڭ كريمينوگەندى اۋداندارداعى قىلمىستىڭ ناقتى كورىنىسىن قالىپتاستىرۋ جانە بۇكىل قالا بويىنشا شارالار كەشەنىن انىقتاۋ ءۇشىن ساراپشىلارمەن، قۇقىق قورعاۋ ورگاندارىنىڭ ارداگەرلەرىمەن، جوبالىق كەڭسە اياسىندا ساراپشىلارمەن جۇمىستى كۇشەيتۋ قاجەت: قاجەت بولعان جەرلەردە بەينەكامەرالار قويۋ، ۋچاسكەلىك پۋنكتتەر سانىن ارتتىرۋ، پاترۋلدەۋدى كۇشەيتۋ، جارىقتاندىرۋدى جاقسارتۋ، – دەپ اتاپ ءوتتى اسەت يسەكەشيەۆ.
ول قۇقىقتىق ءتارتىپ دەڭگەيىن ودان ءارى ارتتىرۋ بويىنشا ساپالى جۇمىس جۇرگىزۋ قاجەتتىگىن اتاپ ءوتىپ، ءبىرقاتار ناقتى تاپسىرمالار بەردى.كەڭەسكە باس پروكۋرور عيزات نۇرداۋلەتوۆ، ىشكى ىستەر ءمينيسترى ەرلان تۇرعىمبايەۆ، پرەزيدەنت اكىمشىلىگىنىڭ قاۋىپسىزدىك جانە قۇقىق ءتارتىبى ءبولىمىنىڭ مەڭگەرۋشىسى الەكسەي كالايچيدي جانە الماتى قالاسىنىڭ قۇقىق قورعاۋ ورگاندارىنىڭ باسشىلارى قاتىستى.