1955 جىلعى ناۋقاس الماتى قالالىق جەدەل شۇعىل كومەك كورسەتۋ اۋرۋحاناسىنىڭ (قجشككا) حيرۋرگيا بولىمشەسىنە ءىشىنىڭ اۋرۋىنا، ءناجىس پەن جەل شىعۋىنىڭ قيىنداۋىنا، جۇرەك اينۋ، قۇسۋ، السىزدىك جانە سالماق تاستاۋعا شاعىمدانىپ ءتۇستى (سوڭعى جىلى 20 كگ تاستاعان). ءىش قۋىسى مۇشەلەرىنە جاسالعان كت ءجىتى ىشەك وتىمسىزدىگىن، توق ىشەكتىڭ كوكباۋىر بۇرىشى دەڭگەيىندە قابىرعاسىنىڭ بىركەلكى ەمەس قالىڭداۋ بەلگىلەرىن، باۋىردا ديففۋزدى وزگەرىستەردى، سوزىلمالى حولەسيستيت بەلگىلەرىن جانە ءوت قابىنداعى توقىراۋدى، پنيەۆماتوزدى، ىشەك كاپروستازىن، دوليحوكولوندى انىقتادى. جاعداي ناۋقاستىڭ قاتار جۇرگەن اۋرۋى – 3-دارەجەلى ارتەريالىق گيپەرتەنزيا جانە جۇرەك-قان تامىرلارى اسقىنۋىنىڭ جوعارى قاۋپىمەن قيىنداي ءتۇستى.
لاپاروتوميا، قۇرساق قۋىسى مۇشەلەرىن ريەۆيزيالاۋ، قوسىلعان جەرىن كەسۋ، توق ىشەك ىسىگىن اناستوموزبەن رەزەكسيالاۋ، قۇرساق قۋىسىن ساناسيالاۋ جانە درەناجداۋ شۇعىل وتاسىن حيرۋرگتار نۇرحات ەسەنبەكوۆ، داۋرەن ابدۋالييەۆ، رەزيدەنت دياس مىرزاش، وتالىق مەدبيكە ايتولقىن بەكسۇلتانوۆا، انەستەزيولوگ شاحمۇرات كامالوۆ جاسادى.
وتا 3 ساعات 35 مينۋتقا سوزىلدى.
«مۇنداي توق ىشەك ىسىگى ءۇشىن، شۇعىل جاعدايدا، كولوستوما جاسالاتىن. سودان كەيىن ۇزاق ۋاقىت ەمدەلىپ، ونكولوگپەن كەڭەسكەننەن كەيىن نە حيميوتەراپيادان كەيىن ناۋقاسقا ەكىنشى وتا – ستومانى جابۋ جاسالاتىن نەمەسە ءومىرىنىڭ سوڭىنا دەيىن ونكولوگيانىڭ سوڭعى ساتىسىندا كولوستومامەن وتەتىن. ءبىزدىڭ جاعدايدا ناۋقاسقا ەكىنشى وتا قاجەت ەمەس، – دەپ تۇسىندىرەدى نۇرحات ەسەنبەكوۆ، – ءبىز ءبىر ۋاقىتتا ىسىك رەزەكسياسىن جاساپ، توق ىشەكتىڭ اناستوموزىن ءبىرىنشى رەت ءىش قۋىسى حيرۋرگياسىندا اشىق تۇردە جانە لاپاروسكوپيالىق ارالاسۋلار كەزىندە قولداناتىن LigaSure كومەگىمەن شۇعىل تۇردە جاسادىق. سوڭعى مەديسينالىق قۇرال مەن قۇرىلعىلاردا وتا جاساۋ مۇمكىندىگى ءۇشىن اۋرۋحانامىزدىڭ ديرەكتورى الماز بولاتۇلىنا العىس بىلدىرەمىز».
LigaSure جانە ارگوندىق پلازمالىق كواگۋلياسيانى قولدانۋ وتانىڭ كولەمى مەن ۇزاقتىعىن قىسقارتۋعا مۇمكىندىك بەرەدى، بۇل، ءوز كەزەگىندە، پاسيەنتتىڭ ءومىرىن ساقتاپ قالۋ مۇمكىندىگىن ايتارلىقتاي ارتتىرادى.
توق ىشەكتىڭ رەزەكسيالانعان ايماعىنىڭ گيستولوگيالىق ەسەبى شىرىشتى كومپونەنتى بار جوعارى دارەجەلى ادەنوكارسينومانىڭ ءساتتى جويىلعانىن راستادى، رەزەكسيا شەتىندە ىسىك ءوسىمى انىقتالمادى.
ناۋقاس وتادان كەيىنگى 8-كۇنى قاناعاتتانارلىق جاعدايدا ءارى قاراي امبۋلاتورلىق ەم الۋ ءۇشىن ۇيگە شىعارىلدى.