الماتى قالاسى ءبىلىم باسقارماسى باسشىسىنىڭ ورىنباسارى ساكەن ارالبايەۆ پەن المالى اۋدانىنىڭ اكىمى ارمان شامشين №95 مەكتەپ-ليسەيىنە ارنايى بارىپ، Global Teacher Prize 2025-2026 حالىقارالىق بايقاۋىنىڭ قورىتىندىسى بويىنشا الەمدەگى ۇزدىك 50 ءمۇعالىمنىڭ قاتارىنا ەنگەن حيميا ءپانىنىڭ ءمۇعالىمى تاتيانا بەلوۋسوۆانى قۇتتىقتادى، - دەپ حابارلايدى Aqshamnews.kz.
قۇتتىقتاۋ ءىس-شاراسى تاتيانا گەنناديەۆنا 40 جىلدان استام ۋاقىت بويى ەڭبەك ەتىپ كەلە جاتقان ءبىلىم ورداسىنىڭ قابىرعاسىندا ءوتتى.
«الماتىلىق پەداگوگتىڭ الەمدەگى ۇزدىك 50 ءمۇعالىمنىڭ قاتارىنا ەنۋى — وتاندىق ءبىلىم بەرۋ جۇيەسىنىڭ جوعارى دەڭگەيدە ەكەنىن كورسەتەدى. تاتيانا گەنناديەۆنانىڭ كاسىبي جولى ماماندىققا ادالدىقتىڭ جارقىن ۇلگىسى بولىپ، ارىپتەستەرى مەن شاكىرتتەرىنە شابىت بەرەدى»، — دەدى الماتى قالاسى ءبىلىم باسقارماسىنىڭ وكىلدەرى.
تاتيانا بەلوۋسوۆا №95 مەكتەپ-ليسەيىندەگى ەڭبەك جولىن 1984 جىلى باستاعان جانە سودان بەرى وسى ءبىلىم بەرۋ مەكەمەسىندە ۇزدىكسىز قىزمەت ەتىپ كەلەدى. ۇستازدىق قىزمەتى بارىسىندا ول تۇلەكتەردىڭ بىرنەشە بۋىنىن تاربيەلەپ شىعاردى، زاماناۋي ءبىلىم بەرۋ ادىستەمەلەرىن بەلسەندى تۇردە ەنگىزىپ، ونلاين پلاتفورمالار مەن ءبىلىم بەرۋ جوبالارى ارقىلى كەڭ اۋديتورياعا تاجىريبەسى مەن ءبىلىمىن ءبولىسىپ ءجۇر.
پەداگوگتىڭ جوعارى ءبىلىمى بار، پەداگوگيكا عىلىمدارىنىڭ ماگيسترى، «پەداگوگ-شەبەر» بىلىكتىلىگىنە يە جانە اعىلشىن ءتىلىن ەركىن مەڭگەرگەن. ونىڭ ەڭبەگى بىرنەشە مارتە مەملەكەتتىك جانە سالالىق ماراپاتتارمەن باعالانعان. 2024 جىلى تاتيانا بەلوۋسوۆا National Teacher Prize Kazakhstan بايقاۋىندا جەڭىمپاز اتانىپ، «قازاقستان ءمۇعالىمى – 2024» اتاعىن يەلەندى.
تاتيانا بەلوۋسوۆانىڭ Global Teacher Prize بايقاۋىنىڭ توپ-50 تىزىمىنە ەنۋى №95 مەكتەپ-ليسەيى ءۇشىن عانا ەمەس، ەلدەگى بۇكىل ءبىلىم بەرۋ جۇيەسى ءۇشىن ماڭىزدى وقيعا بولدى.
بايقاۋ فيناليستەرىن ماراپاتتاۋ ءراسىمى 2026 جىلى 1-5 اقپان ارالىعىندا دۋبايدا وتەتىن الەمدىك ءبىلىم بەرۋ فورۋمى اياسىندا ۇيىمداستىرىلادى.