الماتىلىق ەپيدەميولوگ حالىقتى قۇربان ايت مەرەكەسىندە توپتاسىپ جينالماۋعا شاقىردى

تاۋلىگىنە كۆي-دىڭ 100-دەن 200-گە دەيىن جاعدايى تىركەلەدى.

الماتى قالاسى سانيتارلىق-ەپيدەميولوگيالىق باقىلاۋ دەپارتامەنتى باسشىسىنىڭ ورىنباسارى قارلىعاش ءابدىجابباروۆا بريفينگ بارىسىندا تۇرعىنداردى قۇربان ايت مەرەكەسى كەزىندە سانيتارلىق نورمالاردى ساقتاۋعا شاقىردى، دەپ حابارلايدى Almaty-akshamy.kz. 

 دەپارتامەنت وكىلىنىڭ ايتۋىنشا، الماتى قالاسىنداعى ەپيدەميولوگيالىق جاعداي ناشارلاي تۇسۋدە. 

 «ماۋسىم ايىندا مامىرمەن سالىستىرعاندا اۋرۋ دەڭگەيى 6،3 ەسەگە ارتتى (94-تەن 595 جاعدايعا دەيىن). تاۋلىگىنە كۆي-دىڭ 100-دەن 200-گە دەيىن جاعدايى تىركەلەدى. اعىمداعى جىلدىڭ 3 شىلدەسىنەن باستاپ دسم ەپيدەميولوگيالىق جاعدايدى باعالاۋ ماتريساسىندا قالا «سارى ايماقتا» تۇر. 2022 جىلدىڭ 6 ايىندا قالادا كوروناۆيرۋس 55 441 ادامنان، شىلدەدە 773 تۇرعىننان انىقتالدى»، - دەيدى قارلىعاش ءابدىجابباروۆا.

سپيكەردىڭ سوزىنشە، مۇنداي جاعدايدا ساقتىق شارالارىن ۇمىتۋعا بولمايدى.

«ءبىز قۇربان ايت مەرەكەسى كەزىندە قۇرباندىق شالۋ راسىمدەرى وتەتىن جەرلەردە جانە مەشىتتەردە بارلىق تۇرعىندارعا ماسكا تاعۋدى ۇسىنامىز، اسىرەسە ادامدار كوپ جينالاتىن جابىق ءۇي-جايلاردا. الەۋمەتتىك قاشىقتىقتى ساقتاۋ، قولدى ءجيى جۋۋ، ادامدار كوپ جينالاتىن ورىندارعا بارماۋ ماڭىزدى»، - دەدى ول.

سونداي-اق، ەپيدەميولوگ مالدى اۆتوكولىكتەردەن جانە جەكە ءۇي يەلىكتەرىنەن ساتۋعا تىيىم سالدى. 

«مال سويۋدى ۇيىمداستىرۋ جانە مال ساتۋ ۆەتەريناريالىق قىزمەتتىڭ رەسمي ۆەتەريناريالىق-سانيتاريالىق قورىتىندىسىن العان سويۋ پۋنكتتەرى مەن الاڭداردا (ۆەتەريناريالىق قىزمەت بەكىتكەن تىزبەگە سايكەس سويۋ پۋنكتتەرى، اۋداندارداعى الاڭدار) جۇرگىزىلۋى ءتيىس. مال سويۋ تەك ۆەتەريناريالىق انىقتاما بولعان جاعدايدا عانا جۇرگىزىلۋى كەرەك»، - دەدى سپيكەر.