ءدىنتانۋ سالاسىنداعى ساراپشى الماسبەك شاعىرباي ءدىندارلاردى ۆاكسينالانۋعا قاتىستى جالعان اقپاراتتان ساقتاندىرادى.
بۇل تۋرالى ول الماتى قالاسىنىڭ وڭىرلىك كوممۋنيكاسيالار قىزمەتىندە وتكەن بريفينگتە مالىمدەدى، دەپ حابارلايدى Almaty-akshamy.kz
ءدىنتانۋشى، ءاقپاراتتىق-تۇسىندىرۋ توبىنىڭ مۇشەسى، قازاقستان رەسپۋبليكاسى ءبىلىم جانە عىلىم مينيسترلىگى عىلىم كوميتەتى فيلوسوفيا، ساياساتتانۋ جانە ءدىنتانۋ ينستيتۋتىنىڭ جەتەكشى عىلىمي قىزمەتكەرى الماسبەك شاعىرباي ءدىندارلارعا ۆاكسينالانۋ تۋرالى قاۋەسەتتەر مەن بولجامداردىڭ اسەر ەتەتىنىن ايتتى. ۆاكسيناعا قارسىلار ادام اعزاسىنا كەز كەلگەن ەكپە سالۋدى توزگىسىز سانايدى. بۇل، ارينە تەرىس پىكىر.
الماسبەك شاعىرباي ەكپەدەن نەمەسە قان قۇيۋدان باس تارتاتىن ازاماتتاردىڭ، كەرىسىنشە، دىننەن باس تارتاتىنىن، سونىڭ سالدارىنان ادام ءولىمى بولاتىنىن اتاپ ءوتتى.
«يسلامدا ادام ءومىرى مەن دەنساۋلىعىنان جوعارى قۇندىلىق جوق دەگەن ءپاتۋا بار. سوندىقتان اركىم ءوز دەنساۋلىعىنا ەرەكشە نازار اۋدارۋى كەرەك. اللا تاعالا ادامنىڭ وزىنە ساقتانۋدى بۇيىرادى. «ساقتانساڭ – ساقتايمىن» دەگەن ناقىل وسىنى بىلدىرەدى»، - دەيدى ءدىنتانۋشى.
الماسبەك شاعىرباي مۇسىلمان عالىمداردىڭ، ەگەر ادام ءولىم مەن ءومىر اراسىندا تۇرسا، ونى اجالدان قۇتقارۋ ءۇشىن كەيدە تىيىم سالىنعان ارەكەتتەرگە دە بارۋعا بولادى دەگەن قاعيدالارىن ەسكە سالدى. ويتكەنى، مۇنداعى باستى ماقسات – ادام ءومىرىن ساقتاپ قالۋ.
«ۆاكسينادا ءدىني تۇرعىدان تىيىم سالىنعان ەشتەڭە جوق. ونى حالال نەمەسە حارام دەپ ءبولۋ دۇرىس ەمەس»، - دەدى الماسبەك شاعىرباي.
الماتىلىق ساراپشى ءدىندارلاردى تەرىس قاۋەسەتكە سەنبەۋگە، تەك مەديسينالىق ماماندار بەرگەن ءارى راستالعان اقپاراتتى زەردەلەۋگە شاقىردى. الماسبەك شاعىربايدىڭ ايتۋىنشا، كوروناۆيرۋستىق ينفەكسيادان قورعانۋ ءۇشىن دەنساۋلىقتى ساقتاۋ، ۆيتاميندەردى قابىلداۋ جانە ەكپە الۋ قاجەت.