ارمانجان بايتاسوۆ الماتىلىقتاردى ۆاكسينالانۋعا شاقىرادى: «ۆيرۋسپەن سوعىس ءجۇرىپ جاتىر، بىزدە قارۋ بار – بۇل ۆاكسينا»
الماتى ەپيدەميولوگيالىق احۋال بويىنشا «قويۋ قىزىل» ايماقتا تۇر. وتكەن تاۋلىكتە مەگاپوليستە كوروناۆيرۋستىق ينفەكسياعا پتر وڭ ناتيجە بەرگەن 1 555 پاسيەنت انىقتالدى، دەپ حابارلايدى Almaty-akshamy.kz.
ينفەكسيانىڭ تارالۋىن ازايتۋ ماقساتىندا تۇرعىنداردى تەگىن ۆاكسينالاۋ جالعاسۋدا. قالادا مەديسينالىق ۇيىمداردا، مەكتەپتەردە، مادەنيەت جانە سپورت وبەكتىلەرىندە، بازارلاردا جانە قالانىڭ سوسو-دا 160 ەكپە پۋنكتى بار (250-گە دەيىن ۇلعايتۋ مۇمكىندىگىمەن). سونداي-اق، 1 028 ادامنان تۇراتىن 237 ۆاكسيناسيا بريگاداسى جۇمىلدىرىلعان.
Nur Otan پارتياسىنان الماتى ءماسليحاتىنىڭ دەپۋتاتى ارمانجان بايتاسوۆ الماتىلىقتاردى ۆاكسينالانۋعا شاقىرادى.
«مەن ۆاكسينانى بۇرىن العانمىن. ۆاكسينا كەز كەلگەن اۋرۋدان نەمەسە ۆيرۋستان قورعانۋدىڭ ەڭ ءتيىمدى ءادىسى دەپ ويلايمىن. ۆاكسينا جاساۋ – بۇل جەكە جاۋاپكەرشىلىك ماسەلەسى، سەبەبى ەگەر ءسىز ۆاكسينالانعان بولساڭىز، سىزدە قورعانىش بار: اۋىرمايسىز جانە ەڭ باستىسى، باسقا ادامدارعا ءقاۋىپ توندىرمەيسىز»، - دەدى ارمانجان بايتاسوۆ.
ا. بايتاسوۆ ينفەكسيالىق گوسپيتالدە كورگەندەرىمەن دە ءبولىستى.
«مەن اۋرۋحانادا بولدىم، وتتەگى جەتىسپەيتىن، دەم الا الماي جاتقان ادامداردىڭ قالاي وزدەرىن ناشار سەزىنەتىنىن كوردىم. بۇل جاعدايعا قاراۋدىڭ ءوزى اۋىر. سوندىقتان ءقازىر ۆيرۋسپەن سوعىس ءجۇرىپ جاتقاندىعىن جانە بىزدە ۆاكسينا دەگەن قارۋدىڭ بارىن ءتۇسىنۋ كەرەك. ۆاكسينا ءوزىڭدى، وتباسىڭدى، دوستارىڭدى قورعايدى»، - دەدى ول.
ايتا كەتەرلىگى،قازىرگى ۋاقىتتا الماتىدا ەپيدەميولوگيالىق احۋال ۋشىعىپ تۇر. ەپيدەميولوگتاردىڭ مالىمەتىنشە، ەڭ جوعارى جۇقتىرۋ بۇرىنعىداي 20-39 جاس ارالىعىنداعى تۇرعىندار اراسىندا تىركەلگەن – 35،6%