وتالاردىڭ ءبارى شاعىن ءينۆازيۆتى ادىسپەن جاسالدى.
الماتىداعى №2 قالالىق كلينيكالىق بالالار اۋرۋحاناسىندا رەسەيلىك ميكروحيرۋرگ اندرەي ۆايتينگەردىڭ قاتىسۋىمەن ەكى كۇندىك شەبەرلىك كلاسى ءوتتى، دەپ حابارلايدى Almaty-akshamy.kz
شارا بارىسىندا پاسيەنتتەر بىلىكتى دارىگەرلەرلەردەن كونسۋلتاسيا الدى، مۋكوپوليساحاريدوز اۋرۋىمەن اۋىراتىن 9 بالاعا مىندەتتى الەۋمەتتىك مەديسينالىق ساقتاندىرۋ ەسەبىنەن وپەراسيا جاسالدى. بىرەگەي كۇردەلى وتالاردى رەسەيلىك مامانمەن بىرگە اۋرۋحانانىڭ تراۆماتولوگيا جانە ورتوپەديا بولىمشەسى مەڭگەرۋشىسى ەرلان سادىربالين مەن بالالار حيرۋرگى ۇلجان سولتانبەكوۆا جاسادى.
«وپەراسيالاردىڭ ءبارى شاعىن ءينۆازيۆتى ادىسپەن جاسالدى. ارنايى قۇرالداردىڭ كومەگىمەن جاسالعان حيرۋرگيالىق مانيپۋلياسيا ساۋساقتاردىڭ قوزعالىسىن قالپىنا كەلتىرۋگە مۇمكىندىك بەرەدى. بىرەگەي وپەراسيالاردى جاساۋ ارقىلى ءبىز دە الداعى ۋاقىتتا كادەگە جارايتىن ۇلكەن تاجىريبە جيناقتادىق»، - دەدى ەرلان سادىربالين.
مۋكوپوليساحاريدوز (مپس) – اعزادا گليكوزامينوگليكانداردىڭ جيناقتالۋى سالدارىنان بولاتىن تۇقىم قۋالايتىن اۋرۋ. دانەكەر تىندەردى زاقىمدايتىن دەرت سالدارىنان جۇيكە جۇيەسى، كوزى، ىشكى ورگاندارى مەن قيمىل-قوزعالىس اپپاراتىنىڭ جۇمىسى بۇزىلادى. مپس الەمدە 100 مىڭ ادامنىڭ 50-ىندە كەزدەسەتىن سيرەك (ورفاندىق) اۋرۋ.
قولدىڭ باسى مەن جۇيكە جۇيەسىندە ءتۋابىتتى جانە جۇرە پايدا بولاتىن سىرقاتتاردى ەمدەۋگە باعىتتالعان شەبەرلىك كلاسى №2 قالالىق كلينيكالىق بالالار اۋرۋحاناسى جانە «ميلوسەرديە» قوعامدىق قورىنىڭ ۇيىمداستىرۋىمەن ءوتتى.
ەستەرىڭىزگە سالا كەتسەك، وپەراسيالار ءمامس پاكەتى ارقىلى قارجىلاندىرىلدى. ەلىمىزدە 18 جاسقا دەيىنگى بالالار مەملەكەت تاراپىنان ساقتاندىرىلادى.