998 گرامم بولىپ تۋعان بالانىڭ اعزالارى جەتىلمەگەن.
الماتىدا دارىگەرلەر كومەگىمەن سالماعى 998 گر بولىپ ومىرگە كەلگەن ءسابيدى امان قالدى، دەپ حابارلايدى Almaty-akshamy.kz.
الماتى قالالىق قوعامدىق دەنساۋلىق ساقتاۋ باسقارماسىنان حابارلاعانداي، قالالىق پەريناتولوگيا جانە بالالار كارديوحيرۋرگياسى ورتالىعىندا سالماعى 998 گرامم بولىپ شالا تۋعان 7 ايلىق نارەستە دۇنيەگە كەلگەن.
جاڭا تۋعان نارەستەنى تەكسەرۋ كەزىندە دارىگەرلەر اعزالارىنىڭ جەتىلمەگەندىگى، بۇيرەك جەتكىلىكسىزدىگىنىڭ اۋىر ءتۇرى، ەكى جاقتى گيپوپلازيا جانە بۇيرەك پوليكتوزى دياگنوزىن قويادى.
«بۇل اۋىر دارەجەدەگى تۋا بىتكەن بۇيرەكتىڭ زاقىمدانۋى. بالانىڭ مەرزىمىنەن بۇرىن 998 گرامم بولىپ تۋىپ، اعزالارىنىڭ جەتىلمەگەندىگىنىڭ ءوزى جاعدايدى كۇردەلەندىرىپ تۇرعان، ەكى بۇيرەكتىڭ زاقىمدانۋى جاعدايدى قيىنداتا ءتۇستى. ونىڭ امان قالۋىنا ءۇمىت از ەدى. ءبىز اعزالاردىڭ جەتىلمەگەندىگىن جەڭە الساق تا، بۇيرەكتەردە اسقىنۋلار بولاتىنىن بىلدىك. سولاي بولدى دا، بالا رەانيماسيادا 52 كۇن، كەيىن نارەستەلەر پاتولوگياسى بولىمشەسىندە 2 اي جاتتى. ءبىز اسفەندياروۆ كافەدراسىنان مامانداردى شاقىردىق، كونسيليۋمدار وتكىزدىك»، - دەدى ورتالىق ديرەكتورىنىڭ ورىنباسارى، دارىگەر-نەوناتولوگ ەلەنا پلۋجنيكوۆا.
ونىڭ ايتۋىنشا، اۋرۋدىڭ اۋىرلىعىنا قاراماستان، بالا جاقسى دامىدى.
بىرتىندەپ جۇرگىزىلگەن بارلىق مەديسينالىق كومەكتەن سوڭ بالا سالماق قوسا باستادى، سونداي-اق، قىز بالادا رەتينوپاتيا انىقتالعاندىقتان، ونىڭ كوزىنە وپەراسيا جاسالدى. اۋرۋحانادان شىعارۋ كەزىندە ەكى كەلىگە دەيىن سالماق قوستى.
«ءسابي اۋرۋحانادان شىققاندا، دەنساۋلىعى ورتاشا-اۋىر دارەجەدە بولاتىن. ونى بىردەن نەفرولوگ پەن ۋرولوگ ەسەپكە الدى. بۇگىنگى تاڭدا بالا بۇيرەكتىڭ جۇمىسىن قامتاماسىز ەتەتىن دارى-دارمەكتەر قابىلدايدى. كەيىن بالا ءسال وسكەن سوڭ، بۇيرەك ترانسپلانتاسياسى تۋرالى ءسوز قوزعاۋعا بولادى. التى ايعا دەيىن ونى جاساۋعا بولمايدى، سەبەبى، بالا سالماق قوسىپ، مىقتى بولا ءتۇسۋى كەرەك. كەيىن اتا-اناسى پورتالعا ارى قاراي ەمدەلۋ ءۇشىن ءوتىنىش بەرە الادى»، - دەدى ەلەنا پلۋجنيكوۆا.