الماتى قالالىق قوعامدىق دەنساۋلىق ساقتاۋ باسقارماسىنىڭ مالىمەتىنشە، ورتالىق قالالىق كلينيكالىق اۋرۋحانادا 40 جاستاعى ناۋقاستىڭ ءوت قابىنان 5 499 تاس الىنعان. بۇل – وتاندىق مەديسينا تاريحىندا تىركەلگەن ەڭ سيرەك جاعدايلاردىڭ ءبىرى، دەپ حابارلايدى aqshamnews.kz
ناۋقاس اۋرۋحاناعا جەدەل كورسەتكىشتەر بويىنشا جەتكىزىلگەن. ونىڭ نەگىزگى شاعىمدارى – وڭ جاق قابىرعا استىنداعى اۋىرسىنۋ، السىزدىك، جۇرەك اينۋى مەن جالپى مازاسىزدىق بولعان. ۋلترادىبىستىق زەرتتەۋ بارىسىندا ءوت قابىندا وتە كوپ كولەمدە كونكرەمەنتتەر (تاستار) انىقتالىپ، دارىگەرلەر لاپاروسكوپيالىق حولەسيستەكتوميا (ءوت قابىن الىپ تاستاۋ) جاساۋعا شەشىم قابىلداعان.
الايدا وپەراسيا ناتيجەسى تاجىريبەلى حيرۋرگتاردىڭ ءوزىن تاڭعالدىردى.
– ءبىز كوپ تاس بولاتىنىن بولجادىق، ءبىراق 5 500-گە جۋىق بولادى دەپ ەشكىم ويلاعان جوق. 20 جىلدىق تاجىريبەمدە مۇنداي جاعدايمەن العاش رەت كەزدەستىم، – دەدى حيرۋرگيا جونىندەگى باس دارىگەردىڭ ورىنباسارى فارابي ستامقۇلوۆ.
وپەراسيانى جۇرگىزگەن حيرۋرگ ءىلياس ساعييەۆ تە اسەرىن جاسىرمادى:
– ءوت قابى ءىشى تاسقا تولىپ تۇرعان فارشتالعان بۇرىش سەكىلدى بولدى. مۇنداي جاعداي ومىردە ءبىر رەت قانا كەزدەسەتىن شىعار، – دەدى ول.
وتا ءساتتى ءوتتى. حيرۋرگتار مەن انەستەزيولوگتاردىڭ ۇيلەسىمدى جۇمىسىنىڭ ارقاسىندا ناۋقاس تەز ەسىن جيىپ، كوپ ۇزاماي اۋرۋحانادان شىعارىلدى.
دارىگەرلەردىڭ ايتۋىنشا، ءوت-تاس اۋرۋى كوبىنە ەش بەلگى بەرمەي، جاسىرىن تۇردە وتەدى. الايدا اۋرۋ اسقىنعان جاعدايدا ونكولوگيالىق دەرتكە، ۇيقىبەزدىڭ جانسىزدانۋىنا (پانكرەونەكروز)، نەمەسە ءتىپتى ءوت-تاس جىلانكوزى (سۆيشش) سەكىلدى اۋىر اسقىنۋلارعا اكەلۋى مۇمكىن.