وڭتۇستىك استاناداعى №7 قالالىق كلينيكالىق اۋرۋحانا حيرۋرگتەرى كرونا اۋرۋى، جارالى كوليت، توق ىشەكتىڭ ديۆەرتيكۋليارلى اۋرۋى، تىك ىشەك ەندومەتريوزى، ىشەكتەگى قاتەرلى ىسىك پەن ونكولوگيالىق ەمەس ىسىكتەردى جوسپارلى تۇردە لاپاروسكوپيالىق تاسىلمەن ەمدەپ كەلەدى.
ەمدەۋ مەكەمەسى ديرەكتورى، تاجىريبەلى حيرۋرگ ماناس رامازانوۆتىڭ ايتۋىنشا، اۋرۋحانا حيرۋرگيا سالاسىنداعى سونى جەتىستىكتەردى، سونىڭ ىشىندە وتانىڭ جاڭا ادىس-تاسىلدەرىن قولدانىسقا ۇنەمى ەنگىزىپ وتىرادى.
«وپەراسيا ءادىسى ناۋقاستىڭ دەنساۋلىق جاعدايى مەن قويىلعان دياگنوزعا قاراي بەلگىلەنەدى. وتا زالدارىنداعى جابدىقتار وپەراسيالارعا تىڭعىلىقتى دايىندالىپ، جوسپارلى وتا جاساۋعا، پاسيەنت ءومىرىن ساقتاپ قالۋعا، وتادان كەيىنگى كەزەڭنىڭ جەڭىل ءوتۋىن قامتاماسىز ەتۋگە مۇمكىندىك بەرەدى. ءبىزدىڭ باستى بايلىعىمىز – ءوز ءىسىن بەس ساۋساعىنداي بىلەتىن جوعارى بىلىكتى ماماندار. ءبىز زاماناۋي قوندىرعىلار مەن كاسىبي مامانداردىڭ ارقاسىندا كۇردەلى وپەراسيالار جاساپ، جاقسى ناتيجەلەرگە قول جەتكىزىپ وتىرمىز»، - دەدى ماناس رامازانوۆ.
باس دارىگەر جۋىردا اۋرۋحانادا بولعان كلينيكالىق جاعدايلاردىڭ ءبىرىن مىسالعا كەلتىردى. ايتۋىنشا، 78 جاساعى پاسيەنت الماتىداعى №7 قالالىق كلينيكالىق اۋرۋحاناعا جوسپارلى ەم الۋ ءۇشىن جاتقىزىلعان. زەينەتكەر الدىن الا امبۋلاتوريا جاعدايىندا تەكسەرۋدەن وتكەن. دەرت وشاعىنان الىنعان بيوپسيا توق ىشەكتىڭ تومەنگى بولىگىندە ءبۇرلى ىسىك بارىن انىقتاپ بەردى. جەتىنشى اۋرۋحانا حيرۋرگتەرى وتا جاساپ، ىسىكتى الىپ تاستاۋ تۋرالى شەشىم قابىلدادى.
«توق ىشەكتىڭ سيگماتارىزدى بولىگىندەگى ىسىكتى لاپاروسكوپيالىق ادىسپەن الىپ تاستاۋ – سالدارى جەڭىل وتانىڭ ءبىرى. مانيپۋلياسيالار شاعىن عانا تىلىك ارقىلى جاسالادى. وپەراسيا بارىسىندا بارلىق ونكولوگيالىق پرينسيپتەر ساقتالادى. سونىمەن قاتار ءار ناۋقاستىڭ دەنساۋلىق جاعدايى مىندەتتى تۇردە ەسكەرىلەدى»، - دەدى ماناس رامازانوۆ.
وتا جاساۋشى حيرۋرگ، پروكتولوگيا بولىمشەسى مەڭگەرۋشىسى مارات كالەنبايەۆتىڭ سوزىنە سۇيەنسەك، ىشەكتەگى ىسىكتەردى ەمدەۋدە قولدانىلاتىن لاپاروسكوپيالىق ءادىستىڭ اشىق وپەراسيالارعا قاراعاندا ءبىرقاتار ارتىقشىلىقتارى بار. بىرىنشىدەن، كىشىگىرىم تىلىك ارقىلى جاسالاتىندىقتان تىندەر كوپ زاقىمدانبايدى، اۋىرسىنۋ سيندرومى مەن وتا كەزىندە قان جوعالتۋ ءقاۋپى تومەن. ناۋقاستىڭ قالپىنا كەلۋ پروسەسى دە ۇزاققا سوزىلمايدى، وتا جاسالعاننان كەيىن بىرەر كۇندە اياققا تۇرىپ جۇرە باستايدى. ءوز كەزەگىندە، بۇل ترومب ءتۇزىلۋ مەن ىشەك قىزمەتىنىڭ بۇزىلۋ ءقاۋپىن تومەندەتەدى.
«ىسىك ىشەك شەڭبەرىنىڭ جارتىسىنان استامىن الىپ جاتتى. سوندىقتان ونى ەندوسكوپيالىق جولمەن الىپ تاستاۋ مۇمكىن ەمەس ەدى. ءبىز سول جاق لاپاروسكوپيالىق گەميكولەكتوميا ءادىسىن پايدالانعان دۇرىس دەگەن شەشىمگە كەلدىك. وپەراسيا سوڭىندا ۆيدەوەندوسكوپيالىق قۇرىلعىنىڭ كومەگىمەن ىشەك بولىكتەرىن بىر-بىرىنە جالعادىق، ناتيجەسىندە ۇلكەن دارەتتىڭ ىشەك ارقىلى ءجۇرۋ قىزمەتى قايتا قالپىنا كەلدى. اپپاراتتىق اناستوموز جالپى وتا سالدارىنان بولاتىن تىگىستىڭ دۇرىس بىتپەۋى سىندى باسقا دا كەرى اسەرلەردى تومەندەتۋگە مۇمكىندىك بەرەدى. پاسيەنت وتادان كەيىن ەكىنشى كۇنى اياققا تۇردى»، - دەدى مارات كالەنبايەۆ.
ەستەرىڭىزگە سالا كەتسەك، حيرۋرگيالىق وپەراسيا ءمامس قاراجاتى ەسەبىنەن جاسالدى. ساقتاندىرۋ پاكەتىندەگى قىزمەتتەردى پايدالانۋ ءۇشىن ناۋقاس مىندەتتى تۇردە ساقتاندىرىلعان بولۋى شارت.