اتىراۋ وبلىسىنداعى 41 ەلدى مەكەن بويىندا قورعانىس قۇرىلىستارى سالىندى.
سۋ تاسقىنى كەزەڭىندە وڭىردە 500-دەن استام كم. قورعانىس قۇرىلىستارى سالىندى. بۇگىندە وبلىستا تجم اسكەري بولىمدەرىنىڭ اسكەري قىزمەتشىلەرىن قوسا العاندا، 10 وڭىردەن كەلگەن قۇتقارۋشىلار توبى بار، دەپ حابارلايدى Almaty-akshamy.kz توتەنشە جاعدايلار مينيسترلىگىنە سىلتەمە جاساپ.
تجم قىزمەتكەرلەرى جايىق وزەنىندەگى سۋ دەڭگەيىنە ساعات سايىن مونيتورينگ جۇرگىزەدى. سۋ باسقان ايماقتاردان سۋ سورۋ جۇمىستارى تاۋلىك بويى جالعاسۋدا. قۇلسارى قالاسىندا 2 564 تۇرعىن ۇيدەن سۋ بۇرىلدى.
ازاماتتىق قورعاۋ قىزمەتتەرىمەن، ۆولونتەرلەرمەن جانە تارتىلعان ۇيىمدارمەن اتىراۋ، اقتوبە، باتىس قازاقستان، سولتۇستىك قازاقستان وبلىستارىندا سۋ تاسقىنىنا قارسى ءىس-شارالار، سۋ تاسقىنى سالدارىن جويۋ جانە حالىققا كومەك كورسەتۋ بويىنشا جۇمىستار جالعاسۋدا.
رەسپۋبليكا بويىنشا 7 089 جەكە تۇرعىن ءۇي مەن 2 834 اۋلا اۋماعىنان سۋدىڭ باعىتى بۇرىلىپ، سۋ سورىلدى، 39 352 ادام ءوز ۇيلەرىنە ورالدى. 6 552 ادام ەۆاكۋاسيالاۋ پۋنكتتەرىندە.
سۋ تاسقىنى باستاعالى بەرى 13،1 ملن استام تەكشە مەتر ەرىگەن قار سۋى سورىپ شىعارىلدى، 7،6 ملن استام قاپشىق جانە 1،5 ملن استام توننا ينەرتتى ماتەريال توسەلدى.
اۆاريالىق-قۇتقارۋ جانە سۋ تاسقىنىنا قارسى جۇمىستارعا 17 مىڭنان استام ادام، 2 مىڭعا جۋىق تەحنيكا، 291 سۋ سورۋ قۇرالى جانە 203 ءجۇزۋ قۇرالى، 7 اۋە كەمەسى جۇمىلدىرىلدى.
ءورت ءقاۋىپتى كەزەڭنىڭ باستالۋىنا بايلانىستى تجم ازاماتتاردى تابيعاتقا شىققاندا ءورت قاۋىپسىزدىگى تالاپتارىن ساقتاۋعا شاقىرادى.