الەۋمەتتىك كومەك - باستى نازاردا

قالا اكىمى الەۋمەتتىك كومەك ءۇشىن ءاربىر تيىندى جالپى قالادان جينايتىنىن ايتتى. 

الماتى اكىمى بۇگىن قالا كاسىپكەرلەرىمەن كەزدەستى. ونىڭ بارىسىندا قالا اكىمىنە سۇراقتار مەن وتىنىشتەر دە ءتۇستى، دەپ حابارلايدى Almaty-akshamy.kz.

«بازارلار وزدەرىنىڭ جانىنداعى اۆتوتۇراق ماسەلەسى بويىنشا مەملەكەتكە بىرنەشە رەت جۇگىنگەن. اۆتوتۇراق جۇمىسى قالاي ۇيىمداستىرىلادى؟ جەكە مەنشىك يەسى مەن جالعىز وپەراتوردىڭ ايىرماشىلىعى نەدە؟ اۆتوتۇراق ءۇشىن سالىقتار مەن باسقا دا اۋدارىمداردى تولەۋدە دەلدالدار بولماۋىن سۇرايمىز. سونداي-اق، اۆتوتۇراقتاردى بازار جالعا الۋشىلارىنا بەرۋدى قاراستىرساڭىز»، - دەگەن ءوتىنىش ءتۇستى. 

«جاقىندا «الان پاركينگ» ج ش س مەن «الماتى سپەستەحپاركينگ سەرۆيس» ج ش س اكتيۆتەرىن كوممۋنالدىق مەنشىككە قابىلداۋدى اياقتادىق. 100% كوممۋنالدىق كاسىپورىن بولادى، ءبىر وپەراتوردان تۇسكەن بارلىق كىرىس جەرگىلىكتى بيۋدجەتكە تۇسەدى، دەلدال بولمايدى»، - دەيدى الماتى قالاسىنىڭ اكىمى ەربولات دوسايەۆ. 

مەملەكەتتىك كىرىستەر دەپارتامەنتىنىڭ مالىمەتىنشە، وتكەن جىلى 56 بازار قالا بيۋدجەتىنە 1،8 ملرد تەڭگە، بيىلعى 8 ايدا 2 ملرد تەڭگە تولەگەن. قالاداعى 56 بازاردىڭ اينالىمى 2 جىلدىق قالالىق بيۋدجەتكە تەڭ جانە شامامەن 2 تريلليون تەڭگەگە باعالانادى.

«سوندىقتان، ماعان اۆتوتۇراقتار بازارلارعا، اسىرەسە سولتۇستىك اينالىم ورنالاسقان جەرلەرگە جىلجىتۋ كەرەك دەسە، مەن مۇنىمەن كەلىسپەيمىن. اۆتوتۇراقتار كوممۋنالدىق مەنشىكتە قالادى. بۇكىل الەمدە ادەتتەگىدەي، اۆتوتۇراقتار اكتيۆى قالا اكىمشىلىگىنە تيەسىلى بولادى.

اقىلى اۆتوتۇراقتاردان تۇسكەن تابىس ازاماتتاردىڭ الەۋمەتتىك قاجەتتىلىكتەرىنە جۇمسالادى. جاڭا قۇبىرلار، ينجەنەرلىك جەلىلەر، مەكتەپتەر مەن ەمحانالار، مۇنىڭ ءبارى جەرگىلىكتى بيۋدجەت ەسەبىنەن سالىنادى. الەۋمەتتىك قاجەتتىلىكتەر ءۇشىن بۇكىل قالادان ءاربىر  تيىندى جينايمىن»، - دەدى قالا اكىمى ەربولات دوسايەۆ.