الماتىلىق دارىگەرلەر جۇرەك قاعىسىنىڭ بۇزىلۋىنان ومىرىنە ءقاۋىپ تونگەن پاسيەنتتەردى ەمدەۋدىڭ بىرەگەي ءادىسىن قولدانىسقا ەنگىزدى
وڭتۇستىك استاناداعى №7 قالالىق كلينيكالىق اۋرۋحانانىڭ اريتمولوگتارى جۇرەك قاعىسى بۇزىلعان ناۋقاستارعا كارديومونيتور ورناتۋدى قولعا الدى.
جاڭا ءادىستى اۋرۋحانانىڭ ينتەرۆەنسيوندىق كارديوحيرۋرگيا جانە اريتمولوگيا بولىمشەسىندە اريتمولوگ قانات ەرگەشيەۆ قولدانىسقا ەنگىزدى.
بۇگىندە جۇرەك قاعىسىنىڭ ءتۇرلى اقاۋلارىن انىقتايتىن دياگنوستيكالىق اپپارات كلينيكانىڭ العاشقى پاسيەنتتەرىنە ورناتىلدى، دەپ حابارلايدى اۋرۋحانا باسپا ءسوز قىزمەتى. 21 جاستاعى پاسيەنت №7 اۋرۋحاناعا مي اينالۋ، باس اۋرۋى، السىزدىك، ەسىنەن ايىرىلۋ سىندى سيمپتومدارمەن تۇسكەن.
ينتەرۆەنسيوندىق كارديولوگيا جانە اريتمولوگيا بولىمشەسى مەڭگەرۋشىسى ساكەن انارتايەۆتىڭ ايتۋىنشا، بۇعان دەيىن پاسيەنتتى نيەۆروپاتولوگ ماماندار قاراپ، جۇيكە جۇيەسىندە اقاۋ جوق دەگەن شەشىم شىعارىپتى.
«پاسيەنتتى جان-جاقتى تەكسەردىك، حولتەر قويدىق. ەكگ-حولتەر زەرتتەۋلەرى دە جۇرەك قاعىسىندا ايتارلىقتاي اقاۋ جوق دەگەن ناتيجە بەردى. سودان سوڭ جۇرەك ءىشىن ەلەكتروفيزيولوگيالىق زەرتتەۋ ادىسىمەن تەكسەردىك، ول دا ەشتەڭە كورسەتپەدى. مۇنداي جاعدايلاردا پاسيەنتتەرگە Reveal قوندىرعىسىن ورناتىپ، ۇيىنە جىبەرەمىز، دەيدى كارديوحيرۋرگ.
«كارديومونيتور تەرىنىڭ استىنا ورناتۆلادى. كولەمى كىشىگىرىم فلەش-كارتادان اسپايتىن اپپارات اۋرۋدىڭ جۇرەك قاعىسىن ۇزاق ۋاقىت بويى ەكگ-مونيتورينگ جاساۋعا مۇمكىندىك بەرەدى. يمپلانتتى ورناتۋ 15 مينۋت قانا ۋاقىت الادى، وپەراسيا جەرگىلىكتى جانسىزداندىرۋ ارقىلى جاسالادى جانە پاسيەنت اۋرۋحانادا جاتپايدى. اپپارات جۇرەكتىڭ ەلەكتر يمپۋلستارىن جازىپ وتىرادى، اريتمولوگ مامان ارنايى باعدارلاما ارقىلى جۇرەك تالماسى ۇستاعان كەزدە، ادام ەسىنەن تانعان ساتتە جۇرەك قاعىسى قالاي بووعانىن ءبىلىپ وتىرادى. مالىمەت قاشىقتىقتان الىنادى، پاسيەنتتى اۋرۋحاناعا الدىرتۋدىڭ قاجەتى جوق. وسىلايشا جۇرەك قاعىسىن 3 جىل بويى باقىلاۋدا ۇستاي الامىز. دياگنوز قويىلعاننان كەيىن اپپاراتتى الىپ تاستاۋ ەشبىر قيىندىق تۋدىرمايدى. بۇل اپپارات كۇردەلى دياگنوزداردى انىقتاۋعا، ارى قاراي ەمدەۋ تاكتيكاسىن ايقىنداۋعا مۇمكىندىك بەرەدى»، - دەپ ءتۇسىندىردى ساكەن انارتايەۆ.
ايتۋىنشا، جاس جىگىتتەردىڭ، مىسالى سپورتشىلاردىڭ كەنەتتەن ولىمىنە سەبەپكەر بولىپ جاتاتىن جاسىرىن جۇرەك دەرتتەرىن انىقتاۋعا كومەكتەسەدى. Reveal اپپاراتى جۇرەك قاعىسىنىڭ بەلگىسىز سەبەپتەرى، ەسىنەن تانىپ قۇلاۋ، تۇسىنىكسىز سەبەپتەرمەن ءجيى-جيى باس اينالۋى، جۇرەك تالماسى ۇستاپ ەسىنەن ايىرىلۋ، ارا-اراسىندا از ۋاقىتقا ەنتىگۋ، كەۋدە قۋىسىنىڭ اۋىرۋى، سەبەپسىز شارشاۋ سىندى بەلگىلەر بايقالعان پاسيەنتتەرگە ورناتىلادى.
ەستەرىڭىزگە سالا كەتسەك، جوسپارلى ەمنىڭ بارلىق تۇرلەرى، سونىڭ ىشىندە اتالعان پروسەدۋرا ءمامس ارقىلى قارجىلاندىرىلادى.