وسىلايشا دارىگەرلەر اناسىنىڭ دا، قۇرساقتاعى ءسابيىنىڭ دە ءومىرىن ساقتاپ قالدى.
ورتالىق قالالىق كلينيكالىق اۋرۋحانا دارىگەرلەرى جۇكتىلىكتىڭ 20-اپتاسىندا ايەلدىڭ جاتىر تۇتىكشەسىندەگى وتە ۇلكەن ىسىكتى الىپ تاستادى.
اۋرۋحانا باسپا ءسوز قىزمەتىنىڭ مالىمەتىنشە، 28 جاستاعى پاسيەنت اۋرۋحاناعا «انالىق بەزى كيستاسى» دەگەن دياگنوزبەن تۇسكەن. ىسىكتىڭ ديامەترى 35 سانتيمەترگە جەتىپ، كولەمى 9 ايلىق جۇكتىلىكپەن تەڭەسكەن.
گينەكولوگيا بولىمشەسىنىڭ مەڭگەرۋشىسى المات قوڭىرقۇلجينوۆتىڭ ايتۋىنشا، دارىگەرلەر مۇنداي ۇلكەن كيستانى بۇرىن-سوڭدى كەزدەستىرمەگەن.
تاجىريبەلى حيرۋرگتەر ىسىك كولەمى ءىرى بولعاندىقتان، لاپاروتوميالىق وپەراسيا جاساۋ تۋرالى شەشىم قابىلدادى. وتا كەزىندە كيستادان 10 ليترگە جۋىق سۇيىقتىق الىنعان.
«وپەراسيا ءساتتى ءوتتى. دارىگەرلەر ايەلدىڭ رەپرودۋكتيۆتىك ورگاندارىن عانا ەمەس، ىشتەگى نارەستەنى دە ساقتاپ قالدى. ءقازىر ولاردىڭ ومىرىنە تونگەن ءقاۋىپ تولىعىمەن سەيىلدى»، - دەيدى المات قوڭىرقۇلجينوۆ.
وتا مىندەتتى الەۋمەتتىك مەديسينالىق ساقتاندىرۋ شەڭبەرىندە جاسالدى.